बाटैबाट फर्कियो खोप बोकेको विमान

चीनबाट कोरोनाविरुद्धको खोप बोकेर आएको विमान आकाशबाटै फर्किएको छ । मौसम बिग्रिएकाले जहाज अवतरण गराउन नसकेपछि विमान नेपालको आकाशबाटै उता फर्किएको हो ।

त्रिभुवन विमानस्थलमा मौसम खराबीका कारण जहाज अवतरण हुन नसकेपछि आज बिहान जहाज चीनतर्फ फर्किएको हो । एसियाली विकास बैंकको सहयोगमा ल्याइएको भेरोसिल खोप मौसम खराबीको कारण फिर्ता भएको हो ।

चीनबाट आज १२ लाख एक हजार आठ सय ८७ मात्रा खोप ल्याइएको थियो । विमानस्थलमा जहाज अवतरण गर्न नसकेपछि खोप फिर्ता गए पनि भोलिसम्ममा आइपुग्ने स्वास्थ्य सेवा विभागको आपूर्ति व्यवस्थापन शाखाले जनाएको छ ।

यस्तै, आज भारतबाट पनि १८ लाख ७० हजार सात सय मात्रा खोप आइपुग्दै छ । कोभ्याक्स सुविधाअन्तर्गत कतार एयरवेजबाट दिउँसो खोप आउन लागेको हो ।