देशको हालत बिग्रिएपछि अफगान महिला फुटबल खेलाडी अष्ट्रेलियामा अभ्यासरत

तालिवानले मुलुकको सत्ता कब्जामा लिएपछि देशबाट निस्किएका अफगान महिला फुटबल टोली अभ्यासमा जुटेको छ । अष्ट्रेलियाको ‘ए’ लिग टिम मेलबर्न भिक्ट्रीले टोलीलाई मैदानमा फर्कने वातावरण बनाइदिएपछि उनीहरु अभ्यासमा फर्किएका हुन् ।

दुई दशकपछि गत अगष्टमा तालिवानले अफगानिस्तानको सत्ता आफ्नो नियन्त्रणमा लिएपछि महिला खेलाडीहरु आफ्नो भविश्यमाथि खतराको घण्टी बजेको देखेर अष्ट्रेलिया पुगेका थिए । उनीहरुलाई मेलबर्न भिक्ट्रीले साथ र समर्थन गरेको हो ।

अफगान टोलीले यो वर्ष भिक्टोरियाको सिनियर महिला प्रतियोगितामा सहभागिता जनाउन खोजिरहेको छ । त्यसैले उनीहरूले मेलबर्नमा आफ्नो पहिलो अभ्यास सत्र पूरा गरेका हुन् । यस वर्ष अफगान टिमले मेलबर्न भिक्ट्रीको ब्यानरमा खेल्नेछ । जसलाई क्लबले पूरा समर्थन गर्ने जनाइएको छ ।

अफगानिस्तानको महिला फुटबल टोली सन् २००७ मा स्थापना भएको हो । टिमले आफ्नो पहिलो आधिकारिक खेल सन् २०१० मा नेपालविरुध्द खेलेको र अफगानिस्तानको महिला फुटबल टोलीले सन् २०१२ मा कतारविरुद्ध पहिलो जित निकालेको हो ।