उवासंघ–चितवनको पदाधिकारीमा अनुभवीहरु मिलेर आउँदै

कुनैपनि संघ–संस्था चलाउन तथा त्यसको मर्म–भावना र उद्देश्यलाई सफल, सार्थक बनाउन अनुभवी, जिम्मेवार, सक्षम र जुझारु टिम चाहिन्छ ।

उद्योग वाणिज्य संघ–चितवनको आगामी कार्यसमितिका लागि यस्तै सबल, कुशल र खारिएका व्यक्तित्व पदाधिकारीमा आउँदैछन् । अध्यक्षमा चुननारायण श्रेष्ठ, वरिष्ठ उपाध्यक्षमा सुमनकुमार श्रेष्ठ, उपाध्यक्षहरुमा चिरञ्जीवी सुवेदी, भोजराज कौडाल र शंकर नेपाल आउन लागेका हुन् ।

आज बिहान भरतपुरमा पत्रकार सम्मेलन गरी उनीहरुले सामूहिक उम्मेदवारी घोषणा गरे । उद्योग वाणिज्य संघ–चितवनको ५५ औं साधारणसभा तथा अधिवेशनको अवसरमा यही फागुनको आगामी ३० गते निर्वाचन हुँदैछ । विगत लामो समयदेखि उद्योग वाणिज्य संघको विभिन्न जिम्मेवारी तथा पदाधिकारीका विभिन्न ओहोदामा रही काम गरी अनुभव हासिल गरिसकेका उनीहरुले आफूहरु एउटै प्यानलबाट चुनावमा जान लागेको बताए ।‘सामूहिक कार्य, सकारात्मक सोच, सहकार्य र आपसी समझदारीबाट नै नेतृत्व चयन हुनुपर्दछ भन्ने हाम्रो मान्यता र संघका अग्रज, पूर्वअध्यक्षहरु र वर्तमान नेतृत्वबाट प्राप्त राय, सुझाव र मार्ग निर्देशन, आम उद्योगी व्यवसायीको चाहना बमोजिम यो उम्मेदवारी प्रस्तुत गरेका हौं’, उनीहरु भन्छन्, ‘हालसम्म संघबाट प्राप्त भएको ज्ञान र अग्रजहरुबाट पाएको निर्देशन र सदस्यहरुको राय, सुझावलाई हृदयंगम गर्दै आगामी कार्यकाललाई सफलताका साथ सम्पन्न गराउने प्रतिबद्धता समेत व्यक्त गर्दछौं ।’

साथै कार्यसमितिलाई पूर्णता दिने सन्दर्भमा समेत यस्तै सामूहिक प्रयास र आपसी समझदारी अनुसार गर्ने, व्यवसायिक हक हितको संरक्षण गर्ने, नीतिगत तहमा बहस पैरवी गर्ने र समग्र चितवनको सामाजिक, आर्थिक विकासको खाका तयार एवम् पैरवी गर्ने गरी अगाडि बढ्ने वचनबद्धता समेत उनीहरुले जनाएका छन् ।

‘चितवनलाई आर्थिक केन्द्रको रुपमा अगाडि बढाउन भूमिका खेल्नेछौं’, हाल संघको वरिष्ठ उपाध्यक्ष रहेका अध्यक्षका प्रत्यासी चुननारायण श्रेष्ठले भने, ‘चितवनबाट उत्पादन भएका बस्तुलाई अन्तर्राष्ट्रिय बजारसम्म लैजान कुटनीतिक पहल गर्नेछौं । चितवनमा लगानीमैत्री वातावरण सिर्जना गरी लगानी भित्र्याउनेतर्फ हाम्रो ध्येय रहनेछ ।’

यसैबीच, अध्यक्षमा चुननारायण र वरिष्ठ उपाध्यक्षमा सुमनकुमार अाजै निर्विराेध निर्वाचित भएका छन् ।

– अजय गोर्खाली