नाम काट्दै, थप्दै अन्ततः महाप्रसाद

नेपाल सरकारले राष्ट्र बैंककै पूर्वनिर्देशक महाप्रसाद अधिकारीको नाम नयाँ गभर्नरको निम्ति आज निर्णय गरे तापनि सिफारिसको सन्तुलन मिलाउन भने त्यसअघि एउटा नाम हेरफेर गरिएको बुझिएको छ ।

सोही बमोजिम पूर्वअर्थसचिव राजन खनालको नाम हिजोको सिफारिसबाट झिकेर राष्ट्रिय योजना आयोगका पूर्वउपाध्यक्ष मीनप्रसाद श्रेष्ठको नाम थपी प्रक्रिया पु¥याउन क्याबिनेट लगिएको हो । नेकपा एमाले र माओवादी मिलेको दुई वर्ष बितिसक्दा पनि अझै एक पक्षलाई मात्रै प्रोत्साहन दिएको भनी चित्तदुखाइ प्रकट भएको थियो । मीनप्रसाद पूर्वमाओवादी कित्ताका हुन् भने हिजै सिफारिसमा परेका तीनै जना एमालेनिकट मानिन्छन् ।

सामान्य हिसाबले महाप्रसाद गभर्नर बनिसकेपछि रिक्त लगानी बोर्डको अध्यक्षमा राजन खनाललाई लगिने चर्चा थियो । तर अब पार्टीभित्रको सन्तुलन मिलाउन मीनप्रसादलाई त्यो ठाउँमा नियुक्त गर्नुपर्ने सरकारमाथि बाध्यता रहन सक्छ ।