अमेरिकाको टेक्सासमा एउटा कारले ठक्कर दिँदा सात जनाको ज्यान गएको छ । दुर्घटनामा घाइते भएका छ जनामध्ये केहीको अवस्था चिन्ताजनक छ ।
आप्रवासीहरु बस्दै आएको स्थान नजिकैको बस स्टपमा उभिएका मानिसहरुलाई कारले ठक्कर दिएको हो । ब्राउन्सभिल सहरमा बिहान साढे ८ बजेको समयमा बस कुरिरहेका २० जनाको समूहलाई कारले ठक्कर दिएको हो ।
घटनाका पीडित सबै भेनेजुएलाका नागरिक हुन् । प्रहरीले कारका चालकलाई नियन्त्रणमा लिएर अनुसन्धान थालेको बताइएको छ ।यता, भारतको केरलामा भएको डुंगा दुर्घटनामा २१ जना पर्यटकको मृत्यु भएको छ । दुर्घटनामा अधिकांश बालबालिका तथा महिलाको मृत्यु भएको हो ।हिजो साँझ ७ बजे मलप्पुरम जिल्लाको तनूर नजिकै पर्यटक सवार डुंगा दुर्घटना भएको प्रहरीले जनाएको छ ।
डुंगामा ४० जना पर्यटक सवार थिए । अझै केही बेपत्ता रहेको आशंका गरिएको छ । उक्त घटनाप्रति राष्ट्रपति द्रौपदी मुर्मू, उपराष्ट्रपति जगदीप धनखड, प्रधानमन्त्री नरेन्द्र मोदी, मुख्यमन्त्री पिनाराई विजयनले दुःख व्यक्त गरेका छन् । सरकारले मृतक परिवारलाई २ लाख रुपैयाँ राहत प्रदानको घोषणा गरेको छ ।
