नेकपा (एमाले) जिल्ला कमिटी रोल्पाका पूर्वअध्यक्ष शान्तकुमार वलीले लुम्बिनी प्रदेश उपाध्यक्ष पदमा उम्मेदवारी दिएका छन्।
पार्टीभित्र मौलाउँदै गएको गुटबन्दीको विरोध गर्दै’ नेता वलीले उपाध्यक्ष पदमा उम्मेदवारी दिएका हुन् । लुम्बिनी प्रदेशमा एमाले उपाध्यक्ष विष्णु पौडेल र महासचिव शंकर पोखरेलको समूह चुनावी मैदानमा उत्रिएको छ। पौडेलनिकट राधाकृष्ण कँडेल र पोखरेलनिकट हरि रिजालले अध्यक्षमा उम्मेदवारी दिएका छन् ।
त्यसो त वली कुनै समूहमा समेटिएका छैनन् । उनले ‘आफू गुटको नभई कार्यकर्ताको समर्थन’मा चुनावी मैदानमा उत्रिएको बताएका छन् । त्यस्तै, उपाध्यक्षमा पौडेल समूहबाट भोजप्रसाद श्रेष्ठ र पोखरेल समूहबाट विश्वराव बराल उम्मेदवार छन्।
नेतृत्व चयन सर्वसम्मत हुन नसकेपछि आज राति ८ बजेदेखि मतदान हुने भनिएकोमा बन्द सत्र लम्ब्याएर भोलि बिहान ७ बजेलाई सार्न लगाइएको छ ।लक्ष्मण आचार्य सचिवमा निर्विरोध हुनुले धेरैतिर तरङ्ग सिर्जना गरेको र त्यसैको फलस्वरूप रातारात केही चलखेलनिम्ति मतदान सारिएको कतिपयको बुझाइ छ ।
