झिर्पु इलेक्ट्रोको ढलान भासिएपछि दुई मजदुर बेपत्ता, १० घाइते

सिन्धुपाल्चोकको भोटेकोशी गाउँपालिका–४, मा रहेको झिर्पु इलेक्ट्रो पावर कम्पनीको ढलान भासिँदा १० जना घाइते भएका छन् भने दुई जना बेपत्ता छन् । 

बर्दियाको ठाकुरबाबा नगरपालिका–३, का ३० वर्षीय रामदिन थारु र सोही नगरपालिका–५, का ३० वर्षीय सुमन थारु बेपत्ता रहेको जिल्ला प्रहरी कार्यालय सिन्धुपाल्चोकका प्रवक्ता डिएसपी निरञ्जन भट्टराईले बताए ।

उनीहरुको खोजतलास जारी छ । आज दिउँसो ड्याम साइडको सुरुङ ढलान गर्ने क्रममा एक्कासी भासिएपछि कार्यरत मजदुरहरु पुरिएका हुन् ।

जिल्ला प्रहरी कार्यालयसहित मातहतका निकायबाट तत्काल खटिएको टोलीले १० जनाको उद्धार गरेपनि दुई जना ढलानमा च्यापिएर बेपत्ता भएको उनले बताए । उनीहरुको खोजी जारी छ । 

घाइते भएकामा बर्दियाका ४० वर्षीय लहानु थारु, ४५ वर्षीय दुर्गा चौधरी, ४० वर्षीय आईतमान थामी छन् । दोलखाका ४१ वर्षीय आइतबहादुर थामी, ३१ वर्षीय विजय थामी, ३० वर्षीय दिपक थामी, ४५ वर्षीय पदमबहादुर थामी, ५८ वर्षीय रामचन्द्र रिमालसहित रोल्पाका २३ वर्षीय सासन रोका मगर र ५६ वर्षीय गोपाल थामी पनि घाइते भएका छन् । 

उनीहरुको विभिन्न अस्पतालमा उपचार भइरहेको र अवस्था खतरामुक्त रहेको प्रहरीले जनाएको छ ।