दुई ठाउँमा मोटरसाइकल दुर्घटना : दुई बिते, तीन जना घाइते

बाँकेमा दुई वटा मोटरसाइकल आपसमा ठोक्किँदा एक जनाको ज्यान गएको छ भने दुई जना घाइते भएका छन् । कोहलपुर नगरपालिका–१२ चप्परगौडीमा गएराती मोटरसाइकल ठोक्किँदा खड्क गुरुङको मुत्यु भएको हो ।

चप्परगौडीबाट कोहलपुरतर्फ जाँदै गरेको भे १२ प ३३९८ र विपरीत दिशाबाट आँउदै गरेको भे ११ प ११८१ नम्बरको मोटरसाइकल एकआपसमा ठोकिएको हो ।

दुर्घटनामा गम्भिर घाइते भएका ३३९८ नम्बरका मोटरसाइकल चालक कोहलपुर नगरपालिका–२ का २९ वर्षीय गुरुङको उपचारको क्रममा कोहलपुरस्थित नेपालगंज मेडिकल कलेजमा मृत्यु भएको प्रहरीले जनाएको छ ।

मोटरसाइकल पछाडि सवार कोहलपुर–२ का २९ वर्षीय राम बहादुर घले घाइते भएका छन् । अर्का मोटरसाइकल चालक सुर्खेतको लेकबेसी नगरपालपालिका–८ का ३८ वर्षीय दल बहादुर सारुको सोही अस्पतालमा उपचार भइरहेको छ ।

त्यस्तै, मोरङमा भएको मोटरसाइकल दुर्घटनामा सुनवर्सी नगरपालिका–९ का २४ वर्षीय राज कुमार शर्माको मृत्यु भएको छ । उनको रंगेली अस्पतालमा उपचारको क्रममा निधन भएको प्रहरीले बताएको छ ।

घाइते सोही मोटरसाइकलमा पछाडि बसेका भारतीय नागरीक २२ वर्षीय किसन कुमजार कामतको रंगेली अस्पतालमा उपचार भइरहेको छ ।

रतुवामाई नगरपालिका–१ मा मे ४ प ४५५१ नम्बरको मोटरसाइकल हिजो अनियन्त्रित भई दुर्घटना भएको हो ।