जगंली च्याउ खाएका पाँचको हालत अझै खराब, आईसीयुमा उपचार

बुटवलमा हिजो बेलुकी जगंली च्याउ खाएपछि बेहोस अवस्थामा अस्पताल भर्ना भएकामध्ये पाँच जनाको अवस्था गम्भीर छ । उनीहरुलाई आईसीयूमा राखेर उपचार गरिएको छ ।

लुम्बिनी प्रादेशिक अस्पतालका सूचना अधिकारी नेत्रबहादुर रानाका अनुसार अस्पताल भर्ना भएकामध्ये स्वास्थ्य अवस्था सामान्य रहेका चार जना घर फर्किएका छन् ।

च्याउ सेवनबाट २८ वर्षीया रिना बिक, २८ वर्षीया कमला बिक, ८ वर्षकी सुप्रिया बिक, ३८ वर्षीय विष्णु बिक र ३३ वर्षीया दुर्गा विकको अवस्था गम्भीर रहेको लुम्बिनी प्रादेशिक अस्पतालले जनाएको छ ।

हिजो जंगली च्याउ खाएर बुटवलमा १५ जना बेहोस भएका थिए । बुटवल उपमहानगरपालिका–१२, नयाँ गाउँका ६, वडा नम्बर ४ लक्ष्मीनगरका सात र वडा नम्बर १३ बेलबासका दुई जना बिरामी भएका हुन् ।