नेपाली डाक्टर भड्किएपछि मेडिकल काउन्सिलको स्पष्टिकरण

नेपाल मेडिकल काउन्सिलले विदेशी चिकित्सकलाई नेपाली चिकित्सक सरह मान्यता दिने दर्ता परीक्षामा सहभागी गराउने व्यवस्थामा कुनै परिवर्तन नभएको जनाएको छ ।

काउन्सिलको नियमावली (पाँचौं संशोधन २०७८) को नियम २० (ङ) र (च) हेरफेर गरी विदेशीलाई नेपाली चिकित्सक सरह मान्यता दिने निर्णय गरेको भन्दै विरोध भएपछि काउन्सिलले स्पष्ट पारेको हो ।

काउन्सिलले जारी गरेको वक्तव्यमा भनिएको छ, ‘स्वास्थ्य र परराष्ट्र मन्त्रालयको सहमति र सहभागितामा नेपाल मेडिकल काउन्सिल र भारतीय आयुर्विज्ञान परिषदबीच चिकित्सकको उपाधिको आपसी मान्यताको विषय दुवै देशका प्रधानमन्त्रीहरूको रोहवरमा भएको समझदारीअनुसार कायन्सिलको २०७६ कात्तिक ५ गतेको पूर्ण बैठकले निर्णय गरी काम कारबाही अगाडि बढेको छ ।’उक्त प्रक्रियाको निम्ति भारतीय पक्षबाट प्रस्तावित परीक्षाको प्रावधान राखिएको र सो व्यवस्थाले चिकित्सकको नेपालमा दर्ता तथा अभ्यासको व्यवस्थामा कुनै परिवर्तन नआएको काउन्सिलले स्पष्ट पारेको हो ।

काउन्सिलका अनुसार यस्ता परीक्षा पूर्वयोग्यताका लागि मात्र प्रयोग हुने र परीक्षामा सफल उम्मेदवारहरु स्वतः दर्ता नहुने व्यवस्था ऐन तथा नियमावलीमा स्पष्ट छ । विदेशीलाई नेपाली चिकित्सक सरह मान्यता दिनेगरी चिकित्सक दर्ता परीक्षामा सहभागी गराउने निर्णय गरेको भन्दै सरकारी चिकित्सक संघ (गोदान) ले विरोध गर्दै आएको छ ।