एयरपोर्टमा चंगा उडाउने, टिकटक बनाउने

महालेखा परीक्षकको ५९ औं वार्षिक प्रतिवेदनले ५० अर्ब १९ करोड १७ लाख लगानी भएका मुलुकका १९ वटा विमानस्थल सञ्चालनमै नभएको उल्लेख गरेको छ । त्यसमध्ये ४५ करोड खर्चिएर निर्मित इलामको फाल्गुनन्द सुकिलुम्बा विमानस्थल पनि पर्छ ।

तीन दशकभन्दा लामो समय खर्चेर निर्माण सम्पन्न भएको यो विमानस्थल अहिले टिकटक बनाउने र चंगा उडाउने स्थान मात्र बनेको छ । तत्कालीन प्रधानमन्त्री झलनाथ खनालले शिलान्यास र तत्कालीन पर्यटन मन्त्री प्रेम आलेसमेत भई २०७८ फागुन १ मा उद्घाटन भएको थियो । तर, उद्घाटन गर्दा खनाल र आलेलगायतको टोलीलाई लिएर आएको नेपाल एयरलाइन्सको जहाज त्यसपछि इलामेले देख्न पाएका छैनन् ।

यता, इलाम नगरपालिकाको पहलमा १७ वटा उडान भने भयो । त्यो पनि नगरपालिकाले प्रत्येक उडानमा ११ जना यात्रुको सुनिश्चितता गरेपछि । नगरपालिकाले यात्रुहरूका लागि ११ लाख ४६ हजार १ सय ९६ रुपैयाँ उडानमा खर्च ग¥यो । नगरको पैसा सकिएसँगै उडान पनि हुन सकेन ।

नगरले यात्रुलाई निःशुल्क टिकट दिइएकोमा विरोध भएको थियो । यती एयरलाइन्सको तारा एयरले नगरपालिकाले कम्तीमा ११ जना यात्रुको सुनिश्चितता गरेपछि १७ पटक उडान भरेको हो । त्यसपछि नगरपालिकाले नेपाल एयरलाइन्ससँग सातामा दुई दिन उडान भरिदिन अनुरोध गरेको छ ।

विमानस्थलमा जहाज उड्न छोडेपछि राप्रपानिकट विद्यार्थीहरूले विरोधस्वरुप चङ्गा उडाएका छन् । यहाँबाट नियमित उडान भए इलाम, पाँचथरसहित भारतको, दार्जिलिङ, सिक्किमलगायतका मानिसहरूलाई हवाई यात्राको लागि सहज हुनेछ । विमानस्थल बनाउन शुरु भएको १० वर्षमा मात्रै निर्माण पूरा भएको हो ।

नेताहरूले उद्घाटनमा हतारो देखाएपनि उडानमा चासो नदिएका कारण विमान स्थल टिकटक सुटिङ स्थलमा परिणत भएको इलामवासीको गुनासो छ ।