सबैले चिरफार गर्दैनन् भन्दै पशु डाक्टरहरु सिठी फुकेर सडकमा

नेपाल भेटेरिनरी एशोसिएसनले हालै प्रतिनिधिसभाबाट पारित पशु सेवा परिषद विधेयक सच्याउन माग गरेको छ । विधेयकका कतिपय प्रावधान त्रुटिपूर्ण रहेकाले सच्याउन माग गर्दै आएको एशोसिएसनले आज सिठी जुलुससहित धर्ना दिएको हो ।

अपराह्न २ बजे त्रिपुरेश्वरस्थित नेपाल पशु चिकित्सक परिषदको कार्यालयबाट निस्किएको सिठी जुलुस बानेश्वर पुगेर धर्नामा परिणत भएको थियो । एशोसिएसमाका कार्यवाहक अध्यक्ष प्रा.डा कृष्ण काफ्लेले नेतृत्व गरेको र्यालीमा महासचिव आसेस भट्टराई,सचिव रामचन्द्र सापकोटालगायत हिकास्ट कलेजका विद्यार्थीहरु पनि सहभागी थिए ।

सो क्रममा प्रदर्शनकारीहरुले ‘योग्यताअनुसार जिम्मेवारी देऊ’, ‘पुग्ने भए अब घर घरमा योग्यता बिनाका डाक्टर”, ‘सबैले गर्दैन चिरफार,होइनौँ हामी बराबर’ लेखिएका प्लेकार्डहरु देखाएर उनीहरुले विरोध गरेका हुन् ।

हालै प्रतिनिधिसभाबाट पारित पशु स्वास्थ्य तथा पशु सेवा परिषद विधेयक २०७६ मा गम्भीर त्रुटी भएको भन्दै त्यसलाई सच्याउन मागसहित पशु चिकित्सकहरु सरकारविरुद्ध सडकमा उत्रिएका हुन् ।