‘हाम्रो पेशा हाम्रो शान’ भन्दै पशु डाक्टरहरुको हुल बानेश्वरको सडकमा

पशु स्वास्थ्य तथा सेवा परिषद् विधेयकमा त्रुटि भएको भन्दै पशु चिकित्सकहरु विरोधमा उत्रिएका छन् । हालै प्रतिनिधिसभाबाट पारित उक्त विधेयक सच्याउन माग गर्दै उनीहरुले आज राजधानीको माइतीघर मण्डलामा प्रर्दशन गरेका हुन् ।

नेपाल भेटेरिनरी एशोसिएशन त्रिपुरेश्वर, नेपाल भेटेरिनरी विद्यार्थी संघ र नेपाल भेटेरिनरी विद्यार्थी एशोसिएशन रामपुरको संयुक्त आयोजनामा प्रर्दशनसहित र्याली निकालिएको हो । एशोसिएशनका कार्यवाहक अध्यक्ष कृष्ण काफ्लेको नेतृत्वमा भएको विरोध कार्यक्रममा महासचिव आसेस भट्टराईलगायत झण्डै आठ दर्जनको सहभागिता रहेको छ ।

प्रर्दशनकारीहरुले ‘योग्यता अनुसार जिम्मेवारी देऊ’, ‘अन्धो भयो सरकार चिनेन् प्राविधिक र डाक्टर’, ‘संख्या होइन् योग्यता हेर, पशु चिकित्सकको सम्मान गर’, ‘हाम्रो पेशा हाम्रो शान र प्राण भन्दा प्यारो छ’, ‘विवादित विद्येयक संशोधन गर’ लेखिएका प्लेकार्डसहित चर्को नाराबाजी गरेका छन् ।

माइतीघरबाट निस्किएको र्याली बबरमहल र बिजुलीबजार हुदैं नयाँ बानेश्वरतर्फ लागेको छ । पशु स्वास्थ्य तथा सेवा परिषद् विधेयक गत मंगलबार प्रतिनिधिसभाबाट पारित भएको थियो । द्धैअर्थी र गोलमटोल शब्दको प्रयोग गरेर विद्येयक ल्याइएको भन्दै एशोसिएशनले यसअघि नै चरणबद्ध आन्दोलनको घोषणा गरिसकेको छ ।