क्रिकेट कप्तान सन्दीप लामिछानेले तिलगंगाको होटलमा बालिका “बलात्कार” गरेको प्रहरीद्वारा पुष्ट्याई

हाल विदेशमा रहेका नेपाली राष्ट्रिय क्रिकेट टोलीका कप्तान सन्दीप लामिछानेविरुध्द जबरजस्ती करणीको उजुरी परेको छ । १८ वर्षभन्दा कम उमेरकी बालिकासङ्ग उठबस गरेको अभियोगमा उनीविरुध्द महानगरीय प्रहरी परिसर, टेकुमा हिजो जाहेरी परेको प्रहरी स्रोतले पुष्टि गरेको छ ।

प्रहरीले पीडित भनिएकी बालिकाको मेडिकल परीक्षण गराइसकेको छ ।

लामिछानेले दिनभर नगरकोट घुमाएर केन्यातर्फ उड्नु अघिल्लो रात तिलगङ्गास्थित यौटा होटलमा लगेर सहवास गरेको पुष्टि भएको प्रहरीले बतायो । स्वास्थ्य परीक्षणबाट बालिकासँग शारीरिक सम्पर्क गरिएको पुष्टि भएको रिपोर्ट आइसकेको प्रहरीले जानकारी दिएको छ ।

लामिछाने अहिले क्रिकेट प्रतियोगिताको क्रममा वेष्ट इण्डिजमा छन् । तर,उनी जहाँ भए पनि उक्त मुद्दा प्रक्रियामा जाने र काठमाण्डौ विमानस्थलमा पाइला टेक्नासाथ हिरासतमा लिइने प्रहरीको भनाइ छ ।

यता महिलाको विषयमा धारणा राख्दै आएकी समाजशास्त्री निर्मला ढकालले सामाजिक सञ्जालमा सेलिब्रिटी भन्नुको अर्थ नाबालिक केटाकेटी र सोझासाझा फ्यानमाथि हैकम जमाउनु होइन भनेर लामिछाने र हाल जेलमा रहेका अभिनेता पल शाहतर्फ संकेत गरेकी छन् । उनी लेख्छिन्, ‘अर्को पात्र पनि सकिने भएछ,यस्ता घाँस फाँडिएकै राम्रो ।’