“अल बिदा” भनेर निस्किएका पत्रकार अझै भेटिएनन्,खोजी कार्य जारी

सामाजिक सञ्जालमा “अल बिदा” भनेर आज बिहानदेखि सम्पर्कविहिन भएका पत्रकार विदुर कटुवालको अहिलेसम्म पनि अत्तोपत्तो लाग्न सकेको छैन । आफूले मृत्यु रोजेको भन्दै फेसबुकमा लामो स्टाटस लेखेर बेपत्ता भएका उदयपुरका पुराना पत्रकार कटुवालको बारेमा केही जानकारी पाउन सकिएको छैन ।

श्रीमतीसंग डिभोर्स गर्नुभन्दा मर्नु बेस भन्दै स्टाटसको शुरुमै “अल बिदा” लेखेका उनको त्यसयता मोबाइल स्वीच अफ छ । काठमाडौंको बुद्धनगरमा भाइसंग बस्दै आएका उनी बिहानै डेराबाट निस्किएको नजिकको सिसिटिभी क्यामेरामा देखिन्छ । प्रहरीले खोजी कार्यलाई तीव्रता दिएको छ । उद्धार गर्नका लागि पत्रकारहरु पनि खटिएका छन् ।

यता,नेपाल पत्रकार महासंघका पदाधिकारीहरुले बिहानैदेखि प्रहरी वृत्त, नयाँ बानेश्वरमा धर्ना दिएका छन् । प्रहरीले सिंगापुरमा फेसबुकलाई अलर्ट गराइदिनका लागि पत्र पठाइसकेको छ । नेपालमा संविधान दिवसले गर्दा आज अदालत र नेपाल टेलिकम बन्द भएकोले उनको कल डिटेल हेर्न मुश्किल परेको छ ।

उनी यसरी घरबाट निस्किनुको कारण पारिवारिक लफडा भएको बताइन्छ । उनले स्टाटसमा,‘ डिभोर्सको पेपरमा ल्याप्चे लगाएर कायरता देखाउनुभन्दा मृत्यु नै रोजेँ प्रिय रिता, मिस यु’ भनेर श्रीमतीलाई सम्बोधन गरेका छन् । छोरोलाई सम्झाउँदै लेखेका छन्, ‘बाबाले मामुलाई डिभोर्स दिनुभयो भन्ने हल्ला तिमीले सुन्नुभन्दा बाबा मर्नुभयो भन्ने खबर नै ठीक हुन्छ होला छोरो !’

भाइहरुलाई सम्झाउँदै उनले आमा र बाबाको ख्याल गर्न पनि सुझाएका छन् । आज बिहान ९ बजेको समयमा उनले लेखेको फेसबुक स्टाटसमा श्रीमतीलाई पहिलेको कुरा सम्झाउँदै उल्लेख गरेका छन्, ‘प्रिय रिता,तिमीलाई मैले मर्न मन लाग्छ भनेको थिएँ । मर मर भन्थ्यौ । अब मर्छु । बाँच्दिन खुशी हुुनु ।’

पत्रकार कटुवाल सानैदेखि जनयुद्धमा लागेका व्यक्ति हुन् । सक्षम पत्रकारको उदाहरण बनेका उनी लामो समयदेखि क्रियाशील पत्रकारितामा थिए ।