ट्राफिक कारबाही निरन्तर, हिजो पनि साढे तीन हजार

हिजो एकै दिन ट्राफिक नियम उल्लघंन गरेका तीन हजार ४०९ जना चालक कारबाहीमा परेका छन् । राजधानी उपत्यकाका विभिन्न स्थानबाट उनीहरु कारबाहीमा परेका हुन् ।

कारबाहीमा परेकामध्ये मदिरा सेवन गरेर सवारी साधन चलाएका १५९ जना, फुटपाथमा पार्किङ गरेका २४५ जना, हर्नको अनावश्यक प्रयोग गरेका १२५ जना, जथाभावी यात्रु चढाउने र ओराल्ने गरेका १२६ जना रहेको काठमाडौं उपत्यका ट्राफिक प्रहरी कार्यालयले जनाएको छ ।

त्यस्तै, ढोका खुल्ला राखेर सवारी चलाएका ८५ जना, तीव्र गतिमा सवारी साधन चलाएका ४४ जना, सडक लेन उल्लंघन गरेका ४२ जना, रातो बत्तीको उल्लंघन गरेका ५० जना, अवस्था ठीक नभएका सवारी साधन चलाएका ६७ जना, क्षमताभन्दा बढी यात्रु राखेका ३९ जना र अन्य ट्राफिक नियम उल्लंघन गरेका चालकहरुलाई कारबाही गरिएको कार्यालयले जानकारी दिएको छ ।