पार्टी र उम्मेदवारले फेसबुकमा गरेको प्रचारको पनि हिसाब गरिने

निर्वाचन आयोगले राजनीतिक दल तथा तिनका उम्मेदवारले सामाजिक सञ्जालमा गरेको विज्ञापनलाई निर्वाचन खर्चमा समावेश गरेर हिसाब निकालिने बताएको छ ।

मंसिर ४ गते हुने प्रतिनिधिसभा र प्रदेशसभा सदस्य निर्वाचनमा उम्मेदवारहरूको हिजो मनोनयनपत्र दर्तापछि विभिन्न राजनीतिक दल र उम्मेदवारहरूले सामाजिक सञ्जालको प्रयोग गरी प्रचारप्रसार र विज्ञापन गरेपछि आयोगले उक्त चेतावनी दिएको हो ।

आयोगले यसअघि जारी गरेको निर्वाचन व्यवस्थापनअन्तर्गतको सामाजिक सञ्जालको उपयोग सम्बन्धी नीति, २०७७ बमोजिम निर्वाचनका सबै चरण र प्रक्रियामा सामाजिक सञ्जालको समुचित उपयोग भए वा नभएकोबारे अनुगमन र मूल्यांकन भइरहेको जनाएको छ ।

आयोगका प्रवक्ता शालिग्राम शर्मा पौडेलले जारी गरेको विज्ञप्तिमा निर्वाचन आचारसंहिता, २०७९ को दफा १६ मा राजनीतिक दल तथा उम्मेदवारले निर्वाचन खर्चसम्बन्धी पालना गर्नुपर्ने आचरणहरूको व्यवस्था गरिएको स्मरण गराइएको छ । ‘सामाजिक सञ्जालबाट गरिने विज्ञापनको खर्चबारे उम्मेदवारले निर्वाचन सम्पन्न भएपछि कानुनबमोजिम पेस गर्ने निर्वाचन खर्च विवरणमा समावेश गरे नगरेको बारे आयोगको अनुगमन संयन्त्रमा रहेको अभिलेखसँग भिडाइ परीक्षण गरिने छ,’ विज्ञप्तिमा उल्लेख छ ।