सय मीटरमा निशालाई, १० हजारमा सन्तोषीलाई स्वर्ण

पोखरामा हिजोबाट शुरु भएको नवौं राष्ट्रिय खेलकुदअन्तर्गत एथ्लेटिक्सको महिला एक सय मिटर दौडमा निशा चौधरीले नयाँ राष्ट्रिय कीर्तिमा बनाएकी छन् । लुम्बिनी प्रदेशकी निशा चौधरीले यसअघिको १२.१९ सेकेन्डको कीर्तिमान तोडेर स्वर्ण पदक प्राप्त गरेकी छन् । यसअघि देवीमाया पनेरुले सन् १९९९ मा भएको आठौं दक्षिण एसियाली खेलकुद (साग) मा उक्त कीर्तिमान बनाएकी थिइन् ।

त्यसैगरी महिला १० हजार मीटरमा बागमती प्रदेशकी सन्तोषी श्रेष्ठले स्वर्ण पदक जितेकी छन् ।

आजै बिहान भएको दौडमा १३औं दक्षिण एसियाली खेलकुद (साग) मा समेत स्वर्ण पदक विजेता सन्तोषीले बागमती प्रदेशलाई एथलेटिक्सतर्फ पहिलो स्वर्ण दिलाएकी छन् ।

सन्तोषीले निर्धारित दूरी ३६ मिनेट १२.२९ सकेन्डमा पूरा गरेको बताइन्छ । नेपाल पुलिस क्लबकी राजपुरा पछाइले रजत र सशस्त्र प्रहरी बल, नेपालकी पुष्पा भण्डारीले कास्य पदक जितेकी छन् ।