घाँस काटिरहेकी महिलामाथि गोली

कास्कीमा बन्दुकको छर्रा लागेर एक महिला घाइते भएकी छन् । हिजो बिहान साढे ८ बजे कास्कीको माछापुच्छ्रे् गाउँपालिका २, खैमराङमा घाँस काट्दै गरेकी महिला बन्दुकको छर्रा लागेपछि घाइते भएकी हुन् ।

घटनालगत्तै जिल्ला प्रहरी कार्यालय कास्कीबाट खटिएको प्रहरीले हिजो साँझ एक जनालाई बन्दुकसहित पक्राउ गरेको कास्की प्रवक्ता तथा प्रहरी नायव उपरीक्षक सुन्दर तिवारीले बताए । उनका अनुसार घटनालगत्तै खटिएको टोलीले ती व्यक्तिलाई पक्राउ गरेको हो ।

पक्राउ पर्नेमा सोही वडाका २२ वर्षीय आइत सिंह तामाङ हुन् । उनको साथबाट एक नाले भरुवा बन्दुक फेला परेको डिएपी तिवारीले बताए । तामाङलाई जिल्ला अदालत कास्कीबाट हातहतियार तथा खरखजाना सम्बन्धी कसुरमा ८ दिन म्याद थप गरी अनुसन्धान अगाडि बढाइएको छ ।

घाइते महिलाको पोखरास्थित फिस्टेल अस्पतालमा उपचार भइरहेको डिएसपी तिवारीले बताए । महिलामाथि हिजो बिहान घाँस काटिरहेको अवस्थामा छर्रा लागेको हो ।