ज्युँदै फिला काटिएको भैंसी सडकमा अलपत्र

मोरङको कानेपोखरी गाउँपालिका–७ स्थित कानेपोखरी–रंगेली सडकखण्डको चारकोशे जंगलमा एउटा भैँसी तीनवटै खुट्टा गिँडिएको अवस्थामा फेला परेको छ । सवारी साधनको ठक्करबाट घाइते भएर सडकमा पल्टिएको भैँसीको अपराधीहरुले खुट्टा काटेर लगेका हुन् ।

घाइते भैँसीको पछाडिको दुबै र अगाडिको एउटा खुट्टाको तिघ्रासम्मको भाग छिनालेको अवस्थामा स्थानीयले भेटेपछि यो घटना सार्वजनिक भएको हो । उनीहरुका अनुसार समयमै उद्धार नहुँदा आपराधिक सोच भएकाहरुले निर्मम ढंगले भैँसीको खुट्टा मात्रै काटेर लगेका हुन् ।

उक्त जंगल क्षेत्रमा स्थानीय किसानले आफ्ना पशुचौपाया चरणको रूपमा खुल्ला छाड्ने चलन छ ।