मनाङ्गेलाई पनि निर्वाचन आयोगको २४ घण्टे स्पष्टीकरण

निर्वाचन आयोगले गण्डकी प्रदेशका युवा तथा खेलकुदमन्त्री एवम् मनाङ (ख) का उम्मेदवार राजीव गुरुङ (दीपक मनाङ्गे) लाई स्पष्टीकरण सोधेको छ । निर्वाचन आचारसंहिता उल्लंघन गरेको आरोपमा आज आयोगले २४ घण्टे स्पष्टीकरण पत्र बुझाएको छ ।

मनाङ्गेले उम्मेदवारी दिएको मनाङको प्रदेशसभा (ख) मा आयोगले निर्वाचन खर्चको सीमा २३ लाख रुपैयाँ तोकेको छ । तर, उनले ‘३० लाखमा नेपालमा निर्वाचन जित्न नसकिने’ भन्दै एक दिन नोमिनेसन गर्न जाँदा ‘रक्सीमा १५ लाख खर्च भएको’ अभिव्यक्ति दिएको आयोगको भनाइ छ ।

निर्वाचन आचारसंहिताको दफा ४ सबैले पालना गर्नुपर्ने आचरणअन्तर्गत खण्ड (न) मा कुनै प्रकारले निर्वाचनको स्वच्छता वा निष्पक्षतालाई प्रभावित गर्ने गरी कुनै कार्य गर्न नहुने व्यवस्था गरिएको छ । सोहीअनुसार मन्त्री मनाङ्गेलाई आयोगले २४ घण्टाभित्र प्रतिनिधिमार्फत आयोग वा जिल्ला निर्वाचन कार्यालय मनाङमा स्पष्टीकरण पेश गर्न निर्देशन दिएको छ ।

निर्वाचनको निम्ति राजनीतिक दल तथा उम्मेदवारको लागि कायम गरिएको खर्चको सीमा गत असोज ३१ गतेको नेपाल राजपत्रमा प्रकाशन भइसकेको छ ।