अमेरिकाबाट गाँजा पठाइयो, विमानस्थल पुगेका भारतीयसहित २ जना पक्राउ

अमेरिकाबाट नेपाल ल्याइएको १० किलो गाँजा लिन पुगेका दुई जनालाई प्रहरीले पक्रेको छ । गाँजाको पार्सल लिन गएका एक जना भारतीय र अर्का एक जना नेपालीलाई प्रहरीले तत्काल नियन्त्रणमा लिएको बताइन्छ ।

साना बालबालिकाको सोफा र वाटर डिस्पेन्सरको पार्सलमा हालेर ल्याइएको १० किलो तीन सय ग्राम गाँजा बरामद भएको हो । प्रहरीको लागुऔषध नियन्त्रण ब्युरोका प्रवक्ता प्रहरी उपरीक्षक योगेन्द्रकुमार खड्काका अनुसार विमानस्थलमा उक्त पार्सल लिन पुगेका सल्यानका ४३ वर्षीय वीरबहादुर बुढाथोकी र उनीसँगै गएका भारतीय नागरिक २५ वर्षीय राजा कुमार पक्राउ परेका हुन् ।

उनीहरूलाई लागुऔषध (नियन्त्रण) ऐन २०३३ बमोजिम अनुसन्धान भइरहेको जनाइएको छ । ब्युरोले ग्रिन टीको नाममा लागुऔषध खात कारोबार गर्ने दुई जनालाई पनि पक्राउ गरेको छ । पक्राउ पर्नेमा धादिङका रामकुमार श्रेष्ठ र ललितपुरका कविराज खड्का रहेका हुन् । उनीहरूबाट चार सय ४० किलो खात, एउटा जीप र डिजिटल तराजु बरामद गरिएको जनाइएको छ ।