माधव नेपाललाई एमालेमा फर्कन केपी ओलीको आग्रह, महत्वपूर्ण जिम्मेवारी दिने आश्वासन
एमाले अध्यक्ष केपी शर्मा ओलीले पार्टीबाट अलग भई एकीकृत समाजवादी पार्टी गठन गरेका माधवकुमार नेपाललाई एमालेमै फर्कन सार्वजनिक रुपमा आग्रह गर्नुभएको छ ।
आज सुर्खेतमा आयोजित चुनावी सभालाई सम्बोधन गर्दै अध्यक्ष ओलीले एकीकृत समाजवादी अध्यक्ष नेपाललाई एमालेमै फर्कन आग्रह गर्नुभएको हो ।
एमाले विभाजनको झण्डै १५ महिनापछि ओलीले नेपाललाई एमालेमै फर्कन आज पहिलो पटक आग्रह गर्नुभएको छ । तत्कालीन नेकपाभित्रको विवाद र एमाले विभाजनपछि नेपालप्रति कटाक्ष गर्दै आउनुभएका ओलीले चुनावको मुखमा नेता नेपाललाई एमालेमा फर्कन आग्रह गर्नुलाई अर्थपूर्ण ठानिएको छ ।
उहाँले एमालेमै फर्किएमा नेपाललाई महत्वपूर्ण जिम्मेवारी दिने समेत कार्यक्रममा बताउनुभएको छ । ‘तर, यसका लागि विगतमा भएका गल्ती सच्याउनुपर्छ,’ अध्यक्ष ओलीको सर्त छ ।
विगतमा भएका गल्ती सच्याउँदै एमाले प्रवेश गरेमा अध्यक्ष नेपाललाई विगतका तिता कुरा सबै बिर्सन आफू तयार रहेको उहाँको भनाइ छ ।
टिप्पणीहरू