महोत्तरीमा शीर्ष नेताहरुलाई सकस, स्वतन्त्र उम्मेदवारको कडा टक्कर

महोत्तरीमा गत स्थानीय तहको चुनावझैं आगामी प्रतिनिधि सभा तथा प्रदेश सभा निर्वाचनमा पनि स्वतन्त्र उम्मेदवारहरुको ओइरो लागेको छ । स्वतन्त्रहरुले यतिखेर ठूला भनिएका राजनीतिक दलका नेताहरुलाई कडा टक्कर दिने अवस्था देखिएको छ । उनीहरु राजनीतिक दलका लागि नयाँ चुनौती बनेर अगाडि आएका हुन् । 

महोत्तरीका चार वटा निर्वाचन क्षेत्रमध्ये दुई क्षेत्रमा स्वतन्त्र र राजनीतिक दलका उम्मेदवारबीच कडा प्रतिस्पर्धा हुने लक्षण देखिएको छ । क्षेत्र नम्बर २ मा लोकतान्त्रिक समाजवादी पार्टी (लोसपा) का उम्मेदवार महन्थ ठाकुरलाई माछा चिन्ह लिएका स्वतन्त्र उम्मेदवार रामआधार कापडले अप्ठ्यारोमा पार्ने संकेत देखिन थालेको छ । 

‘कापडको सम्भावना बढेर गएको छ,’ स्थानीय मतदाताहरुको विश्लेषण हो यो । अघिल्लो निर्वाचनमा ठाकुर निकै फराकिलो मतका साथ यो क्षेत्रबाट विजयी भएका थिए । सर्लाहीमा दुई पटक चुनाव हारेपछि महोत्तरी गएका ठाकुरलाई यसपटक चुनाव जित्न थप सकस उत्पन्न भएको देखिन्छ । 

यसअघिको निर्वाचनमा आवश्यकता नदेखिँदा पनि उनले छिमेकी मुलुकको नोट बाँडेको आरोप विपक्षीहरुले अहिलेसम्म लगाइरहेका छन् । भारतमा रहेका इष्टमित्रले उपलब्ध गराएको सहयोग रकममा उनका कार्यकर्ताले त्यतिबेला रजाईं गरेको बताइन्छ । महन्थको नाममा आएको रकमले कसैले घर बनाएका थिए भने कसैले गाडी किनेका हुन् । 

ठाकुरलाई त्यतिबेला समानुपातिक उम्मेदवार हुन नदिनुको कारण पनि त्यहि नै थियो । यस पटकको निर्वाचनमा ठाकुरले उच्च जातिका भनिएका ब्राहमण र जमिन्दारहरुको धेरै भर गरेका छन् । यस पटक पनि पाँच वर्षअघिको जस्तै नगदको काम चुनावको दुई दिनअघि हुने स्रोतको बुझाइ छ । अन्यत्रझैँ महोत्तरीमा पनि रकमको ठूलो चलखेल चुनावको मौन अवधिमा हुने गरेको विगतले देखाइसकेको छ ।

सो क्षेत्रमा नेकपा एमाले र जनता समाजवादी पार्टीको तर्फबाट हरिनारायण यादवलाई उम्मेदवार बनाइएको छ । उनी पहिलो संविधान सभामा कृषिमन्त्री थिए । तर, एमालेका कार्यकर्ताहरु उनको समर्थन नगरी कापडलाई सहयोग गरिरहेका देखिन्छन् । कापड विद्यार्थीकालमा नेपाल विद्यार्थी संघका कार्यकर्ता थिए । 

त्यसपछि उनले नेकपा माओवादी केन्द्र रोजे । उनले यसअघि सोही क्षेत्रबाट माओवादीबाट चुनाव लडिसकेका छन् । गत स्थानीय तहको निर्वाचनमा उनी नेकपा एमालेबाट जलेश्वर नगरपालिकाका मेयरमा प्रतिस्पर्धी थिए । पराजय भए पनि उनले राम्रो मत ल्याएका थिए । 

कापड एउटा गैरसरकारी संस्थासँग आवद्ध छन् । गाउँघरमा खानेपानी, बाटो, पुललगायत विकासका काममा उनले हात हाल्दै आएका छन् । जातिगत हिसाबले समेत उनलाई बढी भोट आउने अनुमान लगाउन थालिएको छ । 

उता महोत्तरी क्षेत्र नम्बर–१ मा त्रिपक्षीय प्रतिस्पर्धा देखिएको छ । पटक पटक मन्त्री बनिसकेका सत्ता गठबन्धनका उम्मेदवार गिरिराजमणि पोखरेल, नेकपा एमाले र जनता समाजवादी पार्टीका संयुक्त उम्मेदवार लक्ष्मी महतो तथा स्वतन्त्र उम्मेदवार पोषण थापाबीच रोचक राजनीतिक भीडन्त भएको छ ।

सरकारी उपसचिवबाट राजनीतिमा प्रवेश गरेका थापालाई बर्दिबास नगरपालिकाका मेयर प्रल्हाद क्षेत्रीको समर्थन छ । यता, मतदाताले पनि पोखरेलको विकल्पको रुपमा थापालाई जिताउने घोषणा गरेका छन् । यी सबै कारणले क्षेत्र नम्बर १ मा थापाको चर्चा चुलिएको हो । 

मतदाताहरुले पछिल्लो समय राजनीतिक दलका उम्मेदवारसँग आजित भएकाले स्वतन्त्रलाई विकल्पको रुपमा हेर्न थालेको बताएका छन् । तर, चुनावको अघिल्लो दिनसम्म यस्तै हुन्छ भनेर ठोकुवा गर्न सकिने अवस्था देखिँदैन । सँधै चुनावको अघिल्लो रात ‘भोट’ किनबेच हुने भएकाले पनि अहिलेको प्रचार प्रसारबाट अनुमान गर्न गाह्रो भएको हो । बजारमा सामान किनेझैँ मत पनि खरिदबिक्री हुने भन्दै हाकाहाकी बताउन थालेपछि निर्वाचन कसरी निष्पक्ष भएको ठान्ने ?