भारतीय खुफिया एजेन्सी ‘र’ का अधिकारीहरु नेपालमा सक्रिय

भारतीय खुफिया एजेन्सी ‘र’ को दिल्ली हेडक्वार्टरका अधिकारी आर. कुमारसहित तीन जनाको टोली गत बिहीबारदेखि गोप्य रुपमा नेपालमा छन् । होटल द्वारिकाजमा बसेको उक्त टोलीले देखिने गरेर कुनै भेटघाट र सम्पर्क नगरेको स्रोतको दाबी छ । 

नेपालमा आनिर्वाचन नजिकिँदै गर्दा आएको उक्त टोली दिनभर होटलमा बसेर रातको समयमा मात्रै गोप्य राजनीतिक भेटवार्तामा सक्रिय भएको बताइन्छ उनी कुमार पहिले पनि नेपाल दुई पटक आइसकेका छन् । 

खुफिया एजेन्सीको आर्थिक विभाग तथा कार्यालय सचिवको कार्यभार सम्हालेका र उक्त एजेन्सीको आगामी प्रमुखको दावेदारसमेत रहेका आर कुमारको टोली बैंकक हुँदै थाई स्माइल एयरबाट काठमाडौं आएको बताइन्छ । सो टोलीसँग ‘र’ का नेपाल स्टेशन प्रमुख राघवप्रसाद भट्नागरसहितका अधिकारीहरुले पटक पटक द्वारिकाजमै गएर भेटवार्ता गरेका छन् । 

टोलीले नेपाल प्रहरी र राष्ट्रिय अनुसन्धान विभागका उच्च अधिकारीहरुसँग समेत गोप्य भेट गरी निर्वाचन प्रक्षेपणको बारेमा जानकारी लिएको उच्चस्रोतले जनआस्थालाई बतायो । उनीहरुले राजनीतिक दलका शीर्ष तहका आफू अनुकूल उम्मेदवारहरुलाई जिताउन सक्रिय भूमिका खेलेको आशंका राजनीतिक वृत्तमा गरिएको छ ।

टोलीले अस्ति सोमबार पशुपतिनाथको दर्शन गरेको छ । हिजो नागपोखरीस्थित होटल मेरियटमा दिउँसो साढे १२ बजेदेखि साँझ ५ बजेसम्म बसेर टोली पुनः द्वारिकाज होटल प्रवेश गरेका छ । तर, मेरियटमा को कोसँग छलफल भयो भन्नेबारे केही बताइएको छैन ।