पोखराबाट शव ल्याउन खटिए दुई जना विशेषज्ञ,सेनाको हेलिकप्टर स्ट्याण्डबाइ

पोखरामा हिजो बिहान भएको यति एयरलाइन्सको विमान दुर्घटनामा पहिचान हुन नसकेका शव काठमाडौँ ल्याउन चिकित्सकहरुको विशेषज्ञ टोली पोखरा पुगेको छ । त्रिभुवन विश्वविद्यालय शिक्षण अस्पताल महाराजगन्जका दुई जना विशेषज्ञ डक्टर नेपाली सेनाको हेलिकप्टरबाट पोखरा गएका हुन् । शिक्षण अस्पतालका फरेन्सिक विशेषज्ञ डा. गोपाल चौधरी र डा. समारिका दाहाल केही बेरअघि पोखरा पुगेको बताइएको छ । 

पहिचान हुन नसकेका शवहरु काठमाडौँ ल्याउन नेपाली सेनाको मध्य हवाई सुरक्षा बेसबाट एमआई १७ हेलि र स्काई ट्रक पोखरा लगिएको छ । विशेषज्ञ चिकित्सकले शव परीक्षण गरेपछि सोही हेलिकप्टरमा राखेर शवहरु काठमाडौँ ल्याइनेछ । 

सेनाले शवको अवस्था बुझ्न त्रिभुवन अन्तर्राष्ट्रिय विमानस्थलमा आउने विशिष्ट व्यक्ति र मृतकका आफन्तलाई बस्ने ठाउँको प्रवन्ध पनि मिलाएको छ । विमानस्थल हाताभित्र रहेको काली दल गणले शवबारे जानकारी लिन आउनेहरुलाई बस्न दुई वटा टेन्ट र कुर्सी तयारी अवस्थामा राखेको छ ।

 जहाजमा सवार ७२ जनामध्ये हालसम्म ६९ जनाको शव फेला परेको छ । जसमध्ये अहिलेसम्म ३५ शव पहिचान भैसकेको छ । पहिचान भएका पोखरा र सो आसपासका शवहरु त्यहीँ पोष्टमार्टम गरी मृतकका आफन्तलाई हस्तान्तरण गर्ने तयारी छ । विदेशी र काठमाडौँ घर भएकाहरुको शव भने परीक्षणका लागि शिक्षण अस्पताल महाराजगन्ज लगिने छ ।