अनटेष्ट मोटरसाइकलमा गाँजा ओसार्नेहरु प्रहरी नियन्त्रणमा
सिरहामा लागूऔषधसहित प्रहरीले तीन जनालाई पक्राउ गरेको छ । मिर्चैया नगरपालिकाका ४६ वर्षीय कुशेश्वर यादव, धनगढीमाई नगरपालिकका ३६ वर्षीय गौरव शाही र २४ वर्षीय काले भन्ने भुपेन्द्रबहादुर ठकुरी साढे १० किलो गाँजासहित समातिएका हुन् ।
लागूऔषध नियन्त्रण ब्यूरो सिरहा र ईलाका प्रहरी कार्यालय मिर्चाैयाबाट खटिएको प्रहरी टोलीले हिजो साँझा मिर्चैयाको कटारी चोकबाट १० किलो ५ सय ग्राम गाँजासहित कुशेश्वर र गौरवलाई नियन्त्रणमा लिएको हो । उनीहरु सवार अनटेष्ट लेखिएको मोटरसाइकल जाँच गर्ने क्रममा उक्त गाँजा फेला परेपछि पक्राउ गरेको प्रहरीले जनाएको छ ।
त्यस्तै, थप अनुसन्धानका क्रममा उक्त लागूऔषध ओसारपसारमा भुपेन्द्र पनि संलग्न रहेको पत्ता लागेकाले उनलाई पनि सोही नगरपालिकाको घुर्मी पुलबाट बागमती प्रदेश ०२–०२६ प ०१९७ नम्बरको मोटरसाइकलसहित पक्राउ गरिएको बताइएको छ ।
टिप्पणीहरू