खसीको खोरमा आगो झोसेर चोर फरार,सुन र नगद खरानी

भक्तपुरको सिपाडोलस्थित एक गोठमा आगो लाग्दा नगद र धनमाल जलेर खरानी भएको छ । 

सूर्यविनायक नगरपालिका-८ स्थित सिपाडोल नैचाल आशापुरीमा रहेको राजकुमार तामाङको कटेज तथा गोठमा आज बिहान ३ बजेतिर आगलागी हुँदा दुई वटा भैँसी,एक तोला सुन र चार लाख नगद जलेर खरानी भएको हो । त्यसअघि राती सो स्थानमा रामकृष्ण तामाङको गोठबाट ५० हजार मूल्य पर्ने दुई वटा खसी चोरी भएको र अर्का स्थानीय ठूलोकान्छा तामाङको घरमा समेत ढोका फोरिएको थियो।

प्रहरीका अनुसार ढोका फोरेर धनमाल निकाल्न नसकेपछि चोरले नजिकैको गोठमा आगो झोसेको हुनसक्छ । स्थानीयले बिहान ५ बजेतिर आगो नियन्त्रणमा लिएको बताइएको छ ।