घाँसीकुवा जाने बाटो दिनको चार घण्टा बन्द

पृथ्वी राजमार्गअन्तर्गत तनहुँको विमलनगरदेखि घाँसीकुवासम्मको सडकखण्ड आजदेखि थप १५ दिनका लागि दैनिक चार घण्टा बन्द हुने भएको छ । सडक मर्मत तथा निर्माणका काम जारी रहेकाले दिनको चार घण्टा  सवारी आवागमनमा रोक लगाइएको हो । 

फागुन १८ गतेदेखि राति १२ बजेदेखि बिहान ४ बजेसम्मका लागि यसअघि नै उक्त सडकखण्ड बन्द गरिएको थियो । मर्मतको काम सम्पन्न नभएकाले आजदेखि पुन: समय तोकेर सडक बन्द गरिएको हो । जिल्ला प्रशासन कार्यालय तनहुँले आज राती १२ बजेदेखि चैत १२ गते बिहान ४ बजेसम्म सडक बन्द रहने बताइको छ ।

सिडिओ कार्यालयका अनुसार जिल्ला सुरक्षा समितिको बैठकले यो निर्णय गरेको हो ।  सहायक प्रमुख जिल्ला अधिकारी काशीराम गैरेले सो समयावधिमा अत्यावश्यक सवारीसाधन बाहेक अन्य सवारीसधान पूर्णरुपमा बन्द गर्ने निर्णय भएको जानकारी दिए ।