केही भिआइपी भित्रिए,केही बाहिरिए

आज काठमाडौंबाट कोही मुलुक बाहिर गएका छन् भने केही देशभित्रैका विभिन्न स्थानमा पुगेका छन् । केही भने विदेश र स्वदेशभित्रैबाट हवाई उडानमा राजधानी आएका छन् । 

हिजो राजविराज जानुभएका एमाले वरिष्ठ उपाध्यक्ष ईश्वर पोखरेल आज दिउँसो यति एअरलाइन्सको उडानमा काठमाडौं आउनुभएको छ । नेपालका लागि इजरायलका राजदूत हानान गोडर गोल्डबर्जर काठमाडौंबाट थाई स्माइलको उडानमा दिउँसो १ बजे बैंकक प्रस्थान गर्नुभएको छ । उहाँ अफिसियल भिजिटको निम्ति बैंकक जानुभएको बुझिएको छ । 

त्यस्तै राप्रपा नेपालका अध्यक्ष कमल थापा बुध्द एअरको उडानमा नेपालगञ्ज र राष्ट्रिय सभाका अध्यक्ष गणेशप्रसाद तिमिल्सिना दिउँसो यति एअरलाइन्सको उडानमा पोखराबाट काठमाडौं आउनुभएको छ ।

त्यस्तै पूर्वमन्त्री तथा नेकपा एकीकृत समाजवादीका नेता कृष्णकुमार श्रेष्ठ ‘किसान’ बुध्द एअरको उडानमा मध्यान्ह सिमरा जानुभएको हो । उता दोहाबाट शिक्षा सचिव रामकृष्ण सुवेदी बिहान ११ बजे कतार एअरवेजको उडानमा काठमाडौं आइपुग्नुभएको छ ।

काँग्रेस नेता तथा सांसद सशांक कोइराला बुध्द एअरको उडानमा बिहान काठमाडौंबाट भरतपुर, नेपालका लागि स्विट्जरल्याण्डका राजदूत एलिजाबेथ भोन क्याप्लर दिउँसो नेपालगञ्जबाट बुद्ध एअरमा काठमाडौं र कर्णाली प्रदेशका अर्थमन्त्री विनोद शाह बिहानै बुद्ध एअरको उडानमा राजधानीबाट सुर्खेत जानुभएको बुद्ध एअर स्रोतले जनाएको छ ।