शीतल निवासमा उपराष्ट्रपतिलाई शपथ ग्रहण गराईंदै

गत शुक्रबार निर्वाचित उपराष्ट्रपति रामसहायप्रसाद यादवले पद तथा गोपनीयताको शपथ लिन लाग्नुभएको छ । उहाँलाई राष्ट्रपति रामचन्द्र पौडेलले अहिले केही बेरमा राष्ट्रपति भवन शीतल निवासमा शपथ गराउने विशेष कार्यक्रम राखिएको छ ।

निवर्तमान उपराष्ट्रपति नन्दबहादुर पुनको कार्यकाल चैत ३ मा सकिएको हो । निर्वाचन आयोगले राष्ट्रपति पौडेलसमक्ष हिजो उपराष्ट्रपति निर्वाचनको मत परिणामसहितको प्रतिवेदन बुझाएपछि अहिले शपथ गराउन लागिएको हो ।

शपथलगत्तै उहाँले लैनचौरस्थित उपराष्ट्रपतिको कार्यालयमा पुगेर पदभार ग्रहण गर्ने बताइएको छ । उहाँको सरकारी निवास पनि उपराष्ट्रपतिको कार्यालयसँगै छ ।