प्रचण्ड गाडीबाट हामफालेर भागेपछि सरकार छोड्नुपरेको राप्रपाको गुनासो

राष्ट्रिय प्रजातन्त्र पार्टी (राप्रपा) ले प्रधानमन्त्री पुष्पकमल दाहाल प्रचण्डलाई आफूहरुले गरेको विश्वासको बदलामा धोका पाएको गुनासो गरेको छ । 

प्रतिनिधि सभामा विश्वासको मतको प्रस्तावमाथिको छलफलमा भाग लिँदै राप्रपाका अध्यक्ष राजेन्द्र लिङ्गदेनले यस्तो गुनासो गरेका हुन् । त्यसक्रममा उनले प्रधानमन्त्री प्रचण्डले सहयात्री दलहरुलाई झुक्याएर बाटो मोडेको आरोप लगाए ।  त्यसकारण लाचार भएर बसिरहन उपयुक्त नलागेकाले सरकार छोडेको अध्यक्ष लिङ्गदेनले बताए । 

प्रधानमन्त्री प्रचण्डलाई नयाँ–नयाँ गाडी फेरेर चलाइरहने सवारी चालकसँग तुलना गर्दै उनले भने, ‘गाउँ घरतिर देखिन्छ, एउटा ड्राइभर हुन्छ जो गाडी फेरिरहन्छ । कहिल्यै एउटा गाडीमा टिक्दैन । तर, त्यस्तो ड्राइभर अनुभवी हुन्छ भनिन्छ । त्यस्तै प्रधानमन्त्रीजीलाई पनि हामीले अनुभवी भनेर हाइड्रोजन गाडी दिएका थियौँ । तपाई अनुभवी ड्राइभर हुनुहुन्थ्यो । लाइसेन्सवाला । तर, बिचैमा ओर्लिएर पुरानै गाडी चलाउछु भनेर जानुभयो ।’ 

विश्वासको मतको प्रस्ताव राख्दै प्रधानमन्त्री प्रचण्डले एमाले र राप्रपाले सरकार छोडेपछि पुनः विश्वासको मत लिनुपरेको धारणा राख्नुभएको थियो । त्यसको जवाफमा अध्यक्ष लिङ्गदेनले आफूहरुलाई सामान्य सोधनीसमेत नगरी प्रधानमन्त्रीले बाटो मोडेपछि सरकार छाड्नु आफूहरुको बाध्यता भएको बताए ।