प्रधानमन्त्रीले माग्ने बितिक्कै माधव नेपालले मन्त्रीको नाम दिने
सरकारमा जाने तयारीमा रहेको नेकपा एकीकृत समाजवादीले आफ्नो पार्टीले पाउने मन्त्रालयको संख्या नटुंगिएसम्म भावी मन्त्रीको नाम सार्वजनिक नगर्ने भएको छ ।
आज बसेको सचिवालय बैठकले पार्टीले पाउने मन्त्रालय टुंगो लागेपछि तत्काल बैठक बसेर मन्त्री हुनेहरुको नाम टुंग्याउने निर्णय गरेको छ । बैठकका निर्णयबारे जानकारी दिँदै प्रवक्ता जगन्नाथ खतिवडाले प्रधानमन्त्रीले नाम मागेपछि तत्काल बैठक बसेर निर्णय गर्ने बताए ।
‘सरकारमा सहभागिताको विषयमा व्यापक छलफल गरेका छौं । प्रधानमन्त्रीज्यूले मागेपछि तत्काल बैठक बसेर हामी नाम पठाउने छौं’, उनले भने । प्रवक्ता खतिवडाका अनुसार कुन र कति मन्त्रालय पाउने भन्ने विषयमा कार्यदलले प्रस्ताव गरिसकेकाले सोहीअनुसार गठबन्धनमा सहमति खोजिने छ ।
प्रतिनिधिसभामा १० सिट रहेको एकीकृत समाजवादीले गृहसहित तीनवटा मन्त्रालयमा दाबी गरिरहेको छ । आज बिहान अध्यक्ष माधवकुमार नेपाल र सम्मानित नेता झलनाथ खनालले प्रधानमन्त्री प्रचण्डसँग गर्नुभएको भेटमा सोही अडान राखेको बताइएको छ । तर, प्रधानमन्त्रीले भने दुईवटा मन्त्रालय लिएर सरकारमा आउन प्रस्ताव गरेको स्रोतको दाबी छ ।
आजको बैठकले पार्टीबाट राजीनामा दिएका उपाध्यक्ष केदार न्यौपाने र स्थायी समिति सदस्य चूडामणि जंगलीको राजीनामा स्वीकृत गरेको छ । त्यस्तै, हिजोदेखि काठमाडौंको सडकमा आन्दोलरत मीटरब्याजी पीडितहरुको माग जायज र संवेदनशील रहेकाले त्यसप्रति समर्थन र ऐक्यबद्धता जनाउने बैठकको निर्णय छ ।
टिप्पणीहरू