डलरको लोभ देखाउनेको बालकोटमा बास

डलर साट्ने बहानामा लाखौँ रुपैयाँ ठगी गरेको आरोपमा प्रहरीले एक जनालाई पक्राउ गरेको छ । सिन्धुपाल्चोकको बाह्रबिसे नगरपालिका–२ कर्थलिका २८ वर्षीय भीमबहादुर तामाङ पक्राउ परेका हुन् । उनी भक्तपुरको बालकोटमा बस्दै आएको बताइन्छ ।

काठमाडौँ उपत्यकाका विभिन्न स्थानमा डलर साटिदिने भन्दै ३० लाख ५० हजार रुपैयाँ ठगी गरेको उजुरीका आधारमा काठमाडौँ उपत्यका अपराध अनुसन्धान कार्यालयबाट खटिएको टोलीले उनलाई अस्ति बालकोटस्थित बसपार्कबाट नियन्त्रणमा लिएको हो ।

पक्राउ परेका तामाङलाई थप अनुसन्धान तथा कारबाहीको निम्ति प्रहरी वृत्त सातदोबाटो पठाइएको प्रहरीले जनाएको छ । प्रहरीका अनुसार घटनामा संलग्न अन्य व्यक्तिको समेत खोजी भइरहेको छ ।