पाइलटलाई पखाला लागेपछि नेपाल एयरलाइन्सका अढाई सय यात्रुलाई ज्ञानेश्वरमा सुताइयो

काठमाडौंबाट दुबई उड्न ठिक्क परेको विमानका पाइलट बिरामी भएपछि नेपाल वायु सेवा निगमका यात्रुलाई ६ घण्टा काठमाडौंको एउटा होटलमा राखिएको छ । हिजो राति साढे ११ बजे उड्नुपर्ने विमान आज बिहान सवा ११ बजे उडेको बताइएको छ ।

विमानका को–पाइलट विमानस्थल पुगेपछि एकाएक बिरामी भएको निगमको भनाइ छ । त्यसैले निगमको आरए २२९ नम्बर उडान अन्तिम क्षणमा रोकिएको थियो । को–पाइलट गोपालसिंह विष्टलाई पखाला लागेको बताइन्छ । 

राति उडान रद्द भएपछि बोर्डिङ पास लिइसकेका २६६ जना यात्रुलाई ज्ञानेश्वरको होटल काभेरीलगायत होटलमा लगेर सुताइएको थियो । उता दुबईका यात्रुलाई पनि त्यहाँको होटलमा राखेपछि ११ बजे काठमाडौंबाट उडेको विमानमा आज बेलुकी फर्काईंदैछ ।

उक्त उडानमा ३६ जना नेपाली र २३० जना विदेशी यात्रु थिए ।