उम्मेदवारी दर्तालगत्तै रवि लामिछानेविरुध्द अदालतमा मुध्दा दर्ता

राष्ट्रिय स्वतन्त्र पार्टी (रास्वपा) का सभापति रवि लामिछानेमाथि राहदानी दुरुपयोगमा मुध्दा चलाउनुपर्ने मागसहितको रिट सर्वाेच्च अदालतमा दर्ता भएको छ । 

यसअघि लामिछानेको नागरिकता अवैध रहेको दावी गर्दै मुध्दा हालेका युवराज सफलले राहदानी दुरुपयोगको कसूरमा सजाय माग गर्दै हिजो रिट लगेका थिए । उक्त रिटको अध्ययनपछि सर्वोच्च प्रशासनले आज दर्ता गरेको हो ।  रिटको पेशी भोलिका लागि तोकिएको छ ।

महान्यायाधिवक्ता कार्यालयलाई समेत विपक्षी बनाइएको रिटमा अमेरिकी नागरिक नै रहेको अवस्थामा नेपालको राहदानी लिएकोले लामिछानेउपर कानुनबमोजिम छानबिन गरी मुद्दा दायर गर्नु भन्दै परमादेश माग गरिएको छ । यसअघि महान्यायाधिवक्ता कार्यालयले लामिछानेविरुध्द मुद्दा चलाउनु नपर्ने निर्णय गरेको थियो । 

यता लामिछानेले भने विदेशको स्थायी आवासीय अनुमति पत्र त्यागेको कम्तिमा तीन महिनापछि मात्रै नियुक्ति,उम्मेदवारका लागि योग्य हुने कानुनी प्रावधान मिचेर उम्मेदवारी दर्ता गराएका छन् । मङ्सिर ४ मा चितवन-२ बाट चुनाव जितेका उनको नागरिकता अवैध ठहर भएपछि रिक्त रहेकाले बैशाख १० गते हुने उपचुनावका लागि उनले सोही क्षेत्रबाट उम्मेदवारी मनोनयन गरेका हुन् ।