रवि लामिछानेविरुद्धको मुद्दा अनिल सिन्हा श्रीमानको इजलासमा

राष्ट्रिय स्वतन्त्र पार्टी (रास्वपा) का सभापति रवि लामिछानेमाथि सर्वोच्च अदालतमा दर्ता भएको रिटमा आज सुनुवाइ हुन लागेको छ । उनीविरुद्धको मुद्दा न्यायाधीश अनिलकुमार सिन्हाको इजलास नम्बर ४ को पेसीसूची ‘झ’ मा परेको छ ।

लामिछानेको राहदानी दुरुपयोगसम्बन्धी मुद्दा अघि नबढाउने भन्दै महान्यायाधिवक्ता डा. दीनमणि पोखरेलले गरेको यसअघिको निर्णय बदर गर्नुपर्ने माग गर्दै परेको रिटमाथि प्रारम्भिक सुनुवाई हुन लागेको हो ।

मुद्दा अधिवक्ता युवराज पौडेल ‘सफल’ ले दायर गरेका हुन् । उनले आफ्नो रिट निवेदनमा राहदानी दुरुपयोगमा सजाय हुनुपर्नेमा चैत ६ गतेको निर्णयपछि उन्मुक्ति दिइएको उल्लेख गरेका छन् । महान्यायाधिवक्ताको उक्त निर्णय बदर गर्न सफलले माग गरेका छन् ।

अदालतले गत माघमा दिएको आदेशमा लामिछानेले प्रक्रियागतरूपमा नेपाली नागरिकता नलिएको उल्लेख छ । उक्त फैसलापछि लामिछानेको सांसद, मन्त्री, सभापति र संसदीय दलको नेताको पद गुमेको थियो ।