शरणार्थी बनाएर अमेरिका पठाइदिने भन्दै ठगी गर्नेविरुद्ध प्रहरीमा थप उजुरी

भूटानी शरणार्थी बनाएर अमेरिका लैजाने भन्दै ठगी गर्नेविरुद्ध प्रहरीमा थप जाहेरी पर्न थालेको छ । आज १० जना पीडितले नेपाल प्रहरीको काठमाडौं उपत्यका अपराध अनुसन्धान कार्यालयमा उजुरी दिएका हुन् । 

विभिन्न प्रलोभन देखाएर र विश्वासमा पारेर ठगी गर्ने सन्देश शर्मा, सानु भण्डारी र केशव दुलाललगायतका विरुद्ध जाहेरी प्राप्त भएको कार्यालयका सूचना अधिकारी प्रहरी उपरीक्षक सोमेन्द्रसिंह राठौरले बताए । 

संयुक्त मिलोमतोमा उनीहरुले २०७७ सालदेखि ठगीधन्दा चलाउँदै आएको पाइएको उनले जानकारी दिए । कास्की, दाङ, रुकुम, मोरङ्गलगायत विभिन्न जिल्लाका पीडितहरुले आज छुट्टाछुट्टै उजुरी दर्ता गराएको उनको भनाइ छ । 

गिरोहले उनीहरुबाट करिब पाँच करोड १९ लाख ९७ हजार रुपैयाँभन्दा बढी ठगी गरेको खुल्न आएको छ । कार्यालयले सक्कल जाहेरी दस्तखतलगायतका कागजातहरु आवश्यक अनुसन्धान तथा कारबाहीको लागि जिल्ला प्रहरी परिसर, टेकु पठाएको छ । यता, ठगी गर्ने गिरोह भने प्रहरी हिरासतमा छ ।