सभामुख भेट्न पुगे क्युवाका राजदूत,  अमेरिकाले लगाएको आर्थिक नाकाबन्दीविरुद्ध उभिएकोमा धन्यवाद

नेपालका लागि क्युवाका राजदूत एलेजान्ड्रो सिमानकास मारिनले सभामुख देवराज घिमिरेलाई भेटेका छन् । आज बिहानै सिंहदरवारस्थित सभामुखको कार्यकक्षमा पुगेर उनले शिष्टाचार भेट गरेका हुन् । 

भेटमा संसदीय आदान प्रदान, दुई देशबीचको सम्बन्ध विस्तारलगायतका विषयमा छलफल भएको बताइएको छ । त्यसक्रममा सभामुख घिमिरेले क्युवाको संसदको हालै भएको निर्वाचनमा निर्वाचित अध्यक्ष र सांसदहरुलाई शुभकामना दिँदै दुई देशका संसदबीच मैत्रीपूर्ण सम्बन्ध विस्तारका लागि नेपाल तत्पर रहेको बताउनुभयो । 

त्यस्तै, नेपाल र क्युवाबीच कुटनीतिक सम्बन्ध स्थापना भएको ४८ वर्ष पुगेको स्मरण गर्दै सभामुख घिमिरेले दुई देशबीच आर्थिक, सामाजिक र राजनीतिक क्षेत्रमा सहयोग पुगेको विश्वास पनि व्यक्त गर्नुभयो । महाभूकम्पमा क्युवाको चिकित्सक टोलीले पुर्‍याएको सहयोगको उहाँले खुलेर प्रशंसा पनि गर्नुभयो । 

राजदूत एलेजान्ड्रोले क्युवाको संसदमा पहिलोपटक क्युवा–नेपाल मैत्री समूह गठनको तयारी भएको जानकारी दिँदै नेपालले पनि मैत्री समूह गठन गर्ने विश्वास व्यक्त गर्नुभएको थियो । अमेरिकाले दुई वर्षअघि क्युवामाथि लगाएको आर्थिक नाकाबन्दीविरुद्ध नेपाल उभिएको स्मरण गर्दै नेपालको समर्थनप्रति उहाँले सभामुखलाई धन्यवाद दिनुभयो ।