अमेरिकी राजदूतद्वारा खुम्बुमा झण्डा हस्तान्तरण

हिजो बिहान सोलुखुम्बु जानुभएका नेपालका लागि अमेरिकी राजदूत डिन आर थम्पसनले सगरमाथा आरोहण गर्न लागेको नेपाल–अमेरिका संयुक्त टोलीको दोस्रो समूहलाई मैत्री झण्डा हस्तान्तरण गर्नुभएको छ । उहाँले खुम्बु पुगेर झण्डा हस्तान्तरण गर्नुभएको राजदूत थम्पसनले जानकारी दिनुभएको छ । 

सामाजिक सञ्जालमा लेख्दै राजदूतले हिजोको दिन खुम्बु पुगेर झण्डा हस्तान्तरण गर्न पाएकोमा आफूलाई निकै भाग्यमानी ठान्नुभएको हो । सो अवसरमा आरोहण दलका सदस्यहरु, आरोहण व्यवस्थापन कम्पनीका प्रनिनिधिहरुसँग छलफल गरिएको पनि उहाँले जानकारी दिनुभएको छ ।

उहाँ हिजो बिहान पाँच सदस्यीय टोलीका साथ सिम्रिक एअरको हेलिकोप्टरमा त्यता जानुभएको थियो । टोलीमा राजदूत थम्पसनसहित जेन थम्पसन, माइकल डि चापल, केरी इ सेनेगोन र सुरेन्द्र पण्डित थिए ।