नक्सा पासका लागि काठमाडौँ महानगरमा निवेदनको चाङ

नक्सा स्वीकृत नगरी घर निर्माण गरेका हजारौँ  घरधनीले नक्सा पास गरिदिन आग्रह गर्दै काठमाडौं महानगरपालिकामा निवेदन दिएका छन् । 

मापदण्ड पुगेका तर नक्सा स्वीकृत नगरी बनाइएका घरको नक्सा पास गर्न महानगरपालिकामा यति ठूलो संख्यामा निवेदन परेको हो । प्राप्त निवेदनमध्ये एक हजार ७३५ जनाको नक्सा पास भइसकेको महानगरपालिकाले जनाएको छ । महानगरपालिकाले २०७९ भदौ २३ गते सूचना जारी गर्दै ९० दिनभित्र भवनको नक्सा पेश गर्न निर्देशन दिएको थियो । 

सूचनामा सरकारी, संस्थागत, निजी वा जुनसुकै प्रकृतिको भवनको नक्सा पेश गर्न सकिने उल्लेख थियो । सूचनापछि सात हजार बढीले नक्सा अद्यावधिक गर्न निवेदन दिएको महानगरपालिकाको भनाइ छ । 

त्यस्तै, गत साउनदेखि महानगरको शहरी विकास विभागले ९३२ वटा डीपीसी स्वीकृत गरेको छ । एक हजार ७३५ वटाको निर्माण सम्पन्न गरेर प्रमाणपत्र जारी गरिसकेको छ । महानगरपालिकाको अनुसार यस अवधिमा १० हजार स्क्वायर फिटभन्दा धेरै क्षेत्रफल भएका ७२ वटा भवनको नक्सा स्वीकृत भएको छ । 

महानगरपालिकाले आर्थिक वर्ष २०७५/०७६ देखि ०७८/०७९ सम्ममा १० हजार स्क्वायर फिटभन्दा धेरै क्षेत्रफल भएका २७८ वटा भवनको नक्सा स्वीकृत गरेको छ । शहरी व्यवस्थापन विभागका प्रमुख सुरज शाक्यका अनुसार यी आर्थिक वर्षहरुमा क्रमशः ८६ वटा, ७७ वटा, ६५ वटा र ५० वटा भवनको नक्सा स्वीकृत भएको हो । 

गत वैशाख १ गतेदेखि पाँच हजार स्क्वायर फिटसम्मका भवनको नक्सा स्वीकृत गर्ने अधिकार महानगरपालिकाले वडालाई दिएको छ ।