प्रहरी घेराभित्रैबाट बालकृष्ण खाँणले मास्क खोलेर हात हल्लाए

पूर्वगृहमन्त्री तथा काँग्रेस नेता बालकृष्ण खाँणले नक्कली भुटानी शरणार्थी प्रकरणमा आफ्नो संलग्नता नरहेको दाबी गरेका छन् । पक्राउ परेको पाँच दिनपछि पहिलोचोटी प्रतिक्रिया दिएका उनले यस प्रकरणमा आफू संलग्न नरहेको बताएका हुन् । 

म्याद थपका लागि आज जिल्ला अदालत काठमाडौँमा उपस्थित गराइएका उनले अदालत परिसरमा सञ्चारकर्मीलाई हात हलाउँदै अभिवादन पनि गरे । त्यसक्रममा संक्षिप्त प्रतिक्रिया दिँदै भने, ‘म संलग्न छैन ।’

आज दोस्रो पटक अदालतमा उपस्थित गराइएका खाँण निकै निराश देखिएका थिए । पक्राउ परेको दिन र पहिलोचोटी अदालतमा उपस्थित हुँदा मास्क लगाएका उनले आज मास्क खोलेका थिए तर पाँच दिनपछि पनि उनी पुरानै खरानी रंगको कोट, निलो पाइन्ट र प्रहरीको जस्तौ नीलो क्यापमा देखिए ।

सर्वसाधारण नेपाली नागरिकलाई भुटानी शरणार्थी बनाएर अमेरिका पठाउने भन्दै करोडौँ कुम्ल्याउने गिरोहमा संलग्न भएको आरोपमा खाँणसहित १२ जना समातिएका छन् । उनीहरुमाथि अनुसन्धान पूरा नभएकाले आज चार दिनको म्याद थप गरिएको हो । 

म्याद थपको अनुमति लिन एकैसाथ अदालत लगिएका उनीहरुमध्ये खाँण र एमाले उपाध्यक्ष तथा पूर्वगृहमन्त्री रामबहादुर थापा बादलका सुरक्षा सल्लाहकार इन्द्रजित राईलाई प्रहरीले हत्कडी लगाएको छैन । यस प्रकरणमा पक्राउ परेका अन्य अभियुक्तहरुलाई भने हत्कडी लगाएर अदालत पुर्याएको हो ।