तीनहजारका लागि चक्कु हानेर भागेका चारजना पक्राउ
प्रहरीले चक्कु प्रहार गरी फरार भएका चार जनालाई पक्रेको छ । सिन्धुलीको तिनपाटन गाउँपालिका-५ थाक्लेडाँडा जंगलमा बस्ने लोकबहादुर सार्कीमाथि चक्कु प्रहार गरी भागेका चार जनालाई प्रहरीले समातेको हो ।
पक्राउ पर्नेमा सोही गाउँपालिका-७ का जीवन श्रेष्ठ, खड्कबहादुर श्रेष्ठ, रोशन कामी र सुरेन्द्रबहादुर कामी रहेका छन् । उनीहरुलाई सोही वडाको साँडे भन्ने ठाँउबाट पक्राउ गरेको जिल्ला प्रहरी कार्यालय सिन्धुलीले जनाएको छ ।
उनीहरुले सार्कीको दाहिने पातोमा चक्कु प्रहार गरी घाइते बनाएर तीन हजार रुपैयाँ र एउटा फोन लुटेका थिए । त्यसपछि फरार बनेका उनीहरुलाई प्रहरीले खोजी गरिरहेको थियो । सोही क्रममा उनीहरु हिजो पक्राउ परेको जनाइएको छ ।
प्रहरीका अनुसार चार जनालाई ज्यान मार्ने मुद्दामा एक साताको लागि म्याद थप गरी अनुसन्धान अघि बढाइएको छ ।
टिप्पणीहरू