अस्पतालमा बिरामी बितेपछि उपचार खर्च मिनाहा गर्न केएमसी तयार

काठमाडौँको सिनामंगलमा रहेको केएमसी अस्पतालमा उपचाररत एक बिरामीको निधन भएपछि अस्पताल प्रशासनले उपचारमा लागेको खर्च मिनाहा गर्ने भएको छ । 

हातको सामान्य समस्या जचाउन अस्पताल पुर्याइएकी एक वर्षीया शिशुको उपचारका क्रममा निधन भएको र त्यसलाई लिएर आन्दोलन हुनसक्ने अवस्था देखेपछि सट्याकसुटुक मिलापत्र गरेर अस्पताल प्रशासन खर्च व्यहोर्न राजी भएको बताइन्छ । 

काभ्रेपलाञ्चोक जिल्ला स्थायी बासस्थान भई भक्तपुरमा बस्दै आएका बाबुआमाले आस्मा तामाङलाई अस्ति जेठ ३ गते हात जचाउन केएमसी लगेकोमा उनको आज बिहान ३ बजेतिर मृत्यु भएको बताइएको छ । चिकित्सकको लापरबाहीले बालिकाको मृत्यु भएको आशंकामा परिवारका सदस्यहरुले अस्पतालविरुद्ध आन्दोलनको तयारी थालेका थिए । 

तर, आज बिहान मृतक बालिकाका अभिभावक र अस्पताल प्रशासनबीचको वार्तापछि उपचारमा लागेको सम्पूर्ण खर्च अस्पतालले नै व्यहोर्ने सहमति भएको हो । त्यसपछि सहमतिमै मृतकका परिवारले शव बुझेका छन् । उक्त शव मध्यान्ह बा.०२८ च ४२१७ नम्बरको एम्बुलेन्समा राखेर अन्तिम संस्कारका लागि स्वयम्भूतर्फ लगेको बताइएको छ ।