बैतडीमा नयाँ भाडादर कायम, तोकिएकोभन्दा बढी लिनेलाई कारबाहीको चेतावनी

जिल्ला प्रशासन कार्यालय, बैतडीले छोटो दूरीमा चल्ने सार्वजनिक यातायातको नयाँ भाडादर तय गरेको छ । जिल्लाभित्र सञ्चालनमा रहेका सवारी साधनको नयाँ भाडादर निर्धारण गरिएको हो ।   

गत जेठ ८ गते बसेको सरोकारवालाहरुको बैठकले नयाँ भाडादर निर्धारण गरेको प्रमुख जिल्ला अधिकारी सुरेश पन्थीले बताए । नयाँ भाडादर आजदेखि लागूसमेत भइसकेको उनले जानकारी दिए । 

जसअनुसार गोठलापानीदेखि त्रिपुरासम्मको भाडा २५ रुपैयाँ कायम गरिएको छ । त्रिपुरादेखि बाराकोटसम्म ३०, गोठलापानीदेखि झुलाघाटसम्म १५०, गोठलापानीदेखि वेरासम्म १५०, गोठलापानीदेखि देहिमाण्डौंसम्म ७०, देहिमाण्डौंदेखि सतबाजसम्म ५०, सतबाजदेखि पाटनसम्म ७०, सतबाजदेखि ठाँडसम्म ४०, ठाँडदेखि पाटनसम्म ३० रुपैयाँ तोकिएको छ । 

त्यस्तै, गोठलापानीदेखि पाटन १९०, पाटनदेखि हिरापुर ६०, पाटनदेखि मानिकाखान ८०, मानिकाखानदेखि खोड्पे ३०, पाटनदेखि खोड्पे ११०, गोठलापानीदेखि खोड्पे ३००, झुलाघाटदेखि बित्थड ५५०, ढोल्पोमोडदेखि पूचौडी २०० रुपैयाँ निर्धारण गरिएको छ । 

साथै, कच्ची सडकहरुमा प्रति किलोमिटर आठ रुपैयाँ पाँच पैसाका दरले भाडादर कायम गरिएको प्रशासनले जनाएको छ । तोकिएकोभन्दा बढी भाडा लिनेलाई कारबाही गर्ने चेतावनीसमेत दिइएको छ ।