काँग्रेसको मजदुर संगठनमा शेखर–गगन समूहको बर्चस्व, देउवा पक्ष दुई पदमा सीमित
नेपाली कांग्रेसको मजदुर संगठन नेपाल ट्रेड युनियन महासंघमा ईतर खेमाका उम्मेदवार विजयी भएका छन् । नयाँ नेतृत्व चयनका लागि हिजो भएको निर्वाचनमा शेखर–गगन पक्षका उम्मेदवार विजयी भएका हुन् ।
युनियनको १७ सदस्यीय कार्यसमितिमा १५ जना सो समूहका निर्वाचित भएका छन् । संस्थापन पक्षका योगेन्द्रकुमार कुँवर ४४१ मतसहित अध्यक्षमा निर्वाचित भएका छन् । उनले आफ्नो प्रतिस्पर्धी महेन्द्रप्रसाद यादवलाई ६५ मतान्तरले हराएका हुन् । त्यस्तै, ईतर पक्षबाट वरिष्ठ उपाध्यक्षमा तेजेन्द्रजंग कार्कीले प्रतिस्पर्धी अयोध्याप्रसाद यादवलाई पराजित गरे । उनले ४६९ मत प्राप्त गर्दा यादव ३३६ मतमै सीमित भएका हुन् ।
खुल्ला उपाध्यक्षतर्फ ईतर खेमाकै गणेशबहादुर केसी र ज्योति कोइराला विजयी भएका छन् । केसीले ४३८ र कोइरालाले ४१८ मत हासिल गरेका छन् । उनीहरुले खुल्ला उपाध्यक्षमा भिडेका संस्थापन पक्षका ध्रुवचन्द्र गौतम र शंकर लामिछानेलाई पराजित गरेका हुन् ।
महिला उपाध्यक्षमा राधिका कुइकेल खनालले ३९२ मत ल्याएर जित हासिल गर्दा संस्थापन पक्षबाट भगवती खड्का ३४३ मतसहित पराजित भएकी छिन् । उपाध्यक्ष सेवातर्फ ईतर पक्षबाट नेत्रविक्रम थापा, ललितबहादुर श्रेष्ठ विजयी हासिल गर्न सफल भएका छन् । अनौपचारिक तथा स्वरोजगार क्षेत्रबाट उपाध्यक्षमा ईतर पक्षका राजेश पालिखेले जीत निकालेका छन् ।
अध्यक्षपछिको शक्तिशाली मानिने महासचिवमा पनि शेखर-गगन समूहकै उम्मेदवार विजयी भएका छन् । सो समूहका अजयकुमार राईले ४६४ मतसहित जित हासिल गर्दा प्रतिद्धन्दी डीपी अर्याल ३३७ मतमा सीमित भए । उपमहासचिवतर्फ पनि सोही समूहका जनार्दन भट्टराई र बलदेव तामाङ्ग विजयी हुदाँ संस्थापनतर्फका रञ्जन थापा र राममंगल प्रसाद यादव पराजित भए ।
महिला उपमहासचिवमा सुशीला घिमिरे, सेवा क्षेत्रतर्फ उपसचिवमा देवदत्त बडु निर्वाचित भएका छन् । त्यसैगरी, उत्पादन क्षेत्रको उपमहासचिवमा संस्थापन पक्षका कुलबहादुर खड्का, अनौपचारिक तथा स्वरोजगार क्षेत्रको उपमहासचिवमा रुकमणि थापा विजयी भएका छन् ।
कोषाध्यक्षमा पनि इतर खेमाकै सञ्जय दाहाल विजयी भए । सहकोषाध्यक्षमा संस्थापन पक्षकी गीताकुमारी लामिछाने जीत हात पार्न सफल भइन् । ८८७ मतदाता रहेकोमा ८४६ मत खसेको निर्वाचन समितिले जनाएको छ ।
टिप्पणीहरू