निर्माणाधीन हेलिपोर्टको चर्को विरोध, पर्यटनमन्त्रीलाई ज्ञापनपत्र

नेपाल नागरिक उड्डयन प्राधिकरणले भक्तपुरको सूर्यविनायक नगरपालिका–१०, नलिञ्चोकमा निर्माणाधीन हेलिपोर्टको काम तत्काल रोक्न माग गर्दै स्थानीयले संस्कृति, पर्यटन तथा नागरिक उड्डयन मन्त्रालय गुहारेका छन् । 

मानवबस्तीबीच हेलिपोर्ट राख्न नमिल्ने उल्लेख गर्दै स्थानीय सूर्यबहादुर कार्की, श्रीकृष्ण खत्री र विक्रम थापालगायतले आज भक्तपुरका प्रमुख जिल्ला अधिकारी खगेन्द्रप्रसाद रिजालमार्फत् पर्यटनमन्त्री सुदन किरातीलाई ज्ञापनपत्र बुझाएका हुन् । 

प्राधिकरणको नाममा रहेको ३३ रोपनी जग्गामा हाल हेलिपोर्ट निर्माणको काम अघि बढेको छ । त्यसका लागि ‘रिटेनिङ वाल’ को निर्माण कार्य सम्पन्न भइसकेको छ । उक्त जग्गा वरपर झण्डै एक हजार घरधुरी रहेको जानकारी गराउँदै उनीहरुले सो स्थानमा हेलिपोर्ट राख्न उपयुक्त नहुने बताएका हुन् । 

उक्त जग्गा प्राधिकरणले २०३२ सालमा हवाई जहाजको ‘इष्ट लोकेटर’ का लागि स्थानीयबाट अधिग्रहण गरेको थियो । सोही जग्गा हाल हेलिपोर्टका लागि प्रयोग गर्नु सर्वोच्च अदालतबाट प्रतिपादित सिद्धान्तविपरीत रहेको उनीहरुको ठहर छ । 

त्यस्तै, वातावरण संरक्षण ऐन, २०७६ र वातावरण संरक्षण नियमावली, २०७७ विपरीत वातावरणीय प्रभावसमेत मूल्याङ्कन नगरी हेलिपोर्ट निर्माण गर्न थालिएको आरोप लगाइएको छ । ‘कुनै पनि जनगुनासो, सल्लाह संकलन नगरी, सार्वजनिक सुनुवाईको मौकासमेत प्रदान नगरी उक्त हेलिपोर्ट निर्माण कार्य शुरु गरिएको’, ज्ञापनपत्रमा उल्लेख छ । हेलिपोर्ट निर्माणको क्रममा उक्त स्थानमा रहेको कुलोसमेत मासिदिएको स्थानीयको गुनासो छ ।

कुलो मास्दा सिचाइँमा प्रत्यक्ष असर परेको बताउँदै निवेदकले हेभि भाइब्रेटरले पर्खालको जग खन्दा ५० मीटरसम्म दूरीका घर पूरै चर्किएको जानकारी गराएका छन् । प्राधिकरणले त्यसको क्षतिपूर्ति दिनसमेत बेवास्ता गरेको ज्ञापनमा खुलाइएको छ । 

यसबारे प्राधिकरण र वडा नम्बर–१० को कार्यालयमा जानकारी गराउँदासमेत सुनुवाई नभएको उल्लेख गर्दै उनीहरुले आफ्ना माग सम्बोधन नभएमा चरणबद्ध आन्दोलनमा जाने चेतावनी दिएका छन् ।