पञ्चाङ्ग पात्रो प्रकाशन गर्न चाहनेलाई दस्तुर बुझाउन आह्वान

नेपाल पञ्चाङ्ग निर्णायक विकास समितिले वि.सं २०८१ सालमा लागू हुने पञ्चाङ्ग पात्रो प्रकाशन गर्न चाहनेलाई दस्तुर बुझाउन आह्वान गरेको छ । 

आगामी साउन मसान्तभित्र नारायणहिटी दरबार परिसरभित्र रहेको समितिको कार्यालयमा दस्तुर बुझाउन पञ्चाङ्ग समितिले भनेको हो । समितिले आज सूचना जारी गर्दै सूर्य सिद्धान्तको मूल सूत्रबाटै गृहस्पष्टीकरण, ग्रहको उदय अस्त, चाडपर्व, विवाह, व्रतबन्धको मुहूर्त र ग्रहण आदि विषयहरु समावेश भएको पञ्चाङ्ग गणना गरेर मात्र नियमानुसार दस्तुर बुझाउन सूचित गराएको छ । 

‘पञ्चाङ्गकारले सूर्य सिद्धान्तको मूल सूत्रबाटै गृहस्पष्टीकरण, ग्रहको उदय अस्त, चाडपर्व, विवाह, व्रतबन्धको मुहूर्त र ग्रहण आदि विषयहरु समावेश भएको पञ्चाङ्ग गणना गरी नियमबमोजिमको दस्तुर २०८० साउन मसान्तसम्म यस नारायणहिटी दरबार परिसरभित्र रहेको समितिको कार्यालयमा बुझाउन समस्त पञ्चाङ्गकारहरुमा अनुरोध गरिन्छ’, सूचना उल्लेख छ ।

पञ्चाङ्गकारहरुले आफैंले गणना गरेको कम्तीमा तीन वर्षको पञ्चाङ्गको गणित र वि.सं २०८१ को गणनाको सबै आधार र गणित पेश गर्नुपर्ने समितिले जनाएको छ । 

त्यस्तै, म्याद नाघेर पेश भएका वा अङ्क नपुगेका पञ्चाङ्गहरुलाई स्वीकृति प्रदान नगरिने स्पष्ट पारिएको छ । साथै, भित्रे पात्रो प्रकाशन गर्न चाहने व्यक्ति वा संस्थाले अनिवार्य समितिको स्वीकृति लिनुपर्ने स्मरण गराइएको छ ।