रास्वपाका माननीयलाई अंग्रेजी बोल्ने सचिव चाहियो,जाँच लिएर बल्ल नियुक्ति

रवि लामिछाने नेतृत्वको राष्ट्रिय स्वतन्त्र पार्टी (रास्वपा) की सांसद डा.तोसिमा कार्कीले सचिवालय सचिव नियुक्तिका लागि आवेदन आह्वान गरेकी छन् । आज सार्वजनिक सूचना जारी गरेर उनले आफ्नो सचिवालयमा रहेर काम गर्न इच्छुक युवालाई पाँच दिनभित्र आवेदन दिन भनेकी हुन् ।  

मान्यता प्राप्त विश्वविद्यालयबाट कानुन, राजनीतिशास्त्र, समाजशास्त्र वा अन्तर्राष्ट्रिय सम्बन्ध विषयमा स्नातक गरेकाले आवेदन दिन सकिने सूचनामा उल्लेख छ । समसामयिक राजनीतिक विषयमा जानकार, सूचना प्रविधिसम्बन्धी आधारभूत ज्ञान, सिप र दक्षता भएका, कानुनी अध्ययन र अनुसन्धानमा रुचि भएकालाई प्राथमिकतामा राखिने जनाइएको छ । 

नेपाली र अंग्रेजी भाषामा राम्रो दख्खल भएको, विषम परिस्थितिमा समेत काम गर्न अभिप्रेरित, इमानदारिता, सदाचारिता र नैतिकता भएको, नेपाली टाइप एवं सामान्य डिजाइन गर्न सक्नेलगायतका गुण आवेदकमा हुनुपर्ने छ । 

उम्मेदवार छनौटका लागि विभिन्न चरणमा परीक्षा हुनेछ । प्रारम्भिक चरणमा छनौट भएका आवेदकलाई मात्र लिखित परीक्षाका लागि बोलाइनेछ । लिखित, मौखित र प्रयोगात्मक परीक्षामा सामेल भएका उम्मेदवारलाई उत्कृष्टताको आधारमा छनौट गरिने जानकारी दिइएको छ ।