पहिचान झल्काउन अजेयमेरुद्वारा आफ्नै पालिका ‘गान’ र ‘लोगो’

डडेल्धुराको अजयमेरु गाउँपालिकाले आफ्नै पालिका गान र लोगो तयार गर्ने भएको छ । अजयमेरुको पहिचान झल्किने गरी गाउँपालिकाले पालिका गान र लोगो तयार पार्न लागेको हो । 

गाउँपालिकाले लोगो तथा गानको रचना गर्न चाहने इच्छुक नेपाली नागरिकसँग आवेदन आह्वान गरेको छ । आगामी भदौ ११ गतेभित्र गाउँपालिकाको कार्यालयमा रचना पठाइसक्नुपर्ने जारी सूचना उल्लेख छ । 

गाउँपालिकाको सामाजिक, आर्थिक, भौगोलिक, धार्मिक, ऐतिहासिक, भाषिक, सांस्कृतिक तथा पर्यटकीय मौलिक विशिष्टता झल्किने गरी पालिका गान तथा लोगो तयार गर्नुपर्ने जनाइएको छ । 

त्यस्तै, पालिका गान घटीमा ५० शब्द र बढीमा ६० शब्दको हुनुपर्छ । पालिकाको लोगो नेपालको राष्ट्रिय लोगोकै आकारमा हुनुपर्ने गाउँपालिकाको भनाई छ । 

मूल्यांकन समितिबाट पालिकाको गान र लोगो छनौट गर्ने उल्लेख गर्दै सूचनामा भनिएको छ, ‘रचनाकारले पालिका गान र लोगोमध्ये कुनै एक वा दुवै विधामा प्रतिस्पर्धा गर्न पाउनेछन् ।’